चाँगुनारायण स्थित छिन्नमस्ता महिला बचत तथा ऋण सहकारी संस्था लिमिटेडको आयोजना, नेफ्स्कूनको प्राविधिक सहजीकरण तथा जर्मन स्पार्कसेन्स्टिफ्टुङ्ग (German Sparkassenstiftung)  को सहयोगमा कृषक व्यवसाय खेल तालिम श्रावण २२ गते सम्पन्न भएको छ । 

तिन दिनसम्म चलेको उक्त सघन तालिममा सहभागीहरूले ’खेल’ र ’अभ्यास’ का माध्यमबाट व्यवसाय गर्दा आइपर्ने व्यावहारिक चुनौती र त्यसको समाधानका उपायहरूबारे गहन ज्ञान हासिल गरेका छन् । 

विशेषगरी बाली तथा पशुपालनको सही छनौट, उत्पादनका क्रममा हुनसक्ने मौसमी जोखिमको व्यवस्थापन र वित्तीय औजारहरूको सही सदुपयोग जस्ता विषयमा कृषकहरूलाई दक्ष बनाइएको छ ।

संस्थाका अध्यक्ष शर्मिला श्रेष्ठको अध्यक्षतामा सञ्चालित तालिममा संस्थाका सचिव, सञ्चालक सदस्य, व्यवस्थापक, संस्थाका कर्मचारीहरु तथा सदस्यहरुको सहभागीता रहेको थियो । संस्थाका व्यवस्थापक सुशिला तामाङ्गले सञ्चालन गर्नुभएको सो सत्रमा डि.एस.आइ.के.नेपाल  का प्रतिनिधी सञ्जय झा ले तालिमको औचित्यतामाथि प्रकाश पार्नुभएको थियो ।  

नेफ्स्कूनका अधिकृत कल्पना पराजुली र खिलनाथ लुइँटेलले तालिमको सहजीकरण गर्नुभएको थियो । २२ जनाको सहभागितामा सञ्चालित तालिममा सहभागीहरुले अहिलेसम्मकै फरक किसिमको तालिम लिएको र यसको सिकाई वास्तविक जीवनमा पनि लागू गर्ने प्रतिवद्धता व्यक्ते गरेका छन ।