काठमाडौँ । नेपाल बचत तथा ऋण केन्द्रीय सहकारी संघ लि. (नेफ्स्कून) को आयोजनामा नेपालका दुई  साकोसहरूले हासिल गरेका अन्तर्राष्ट्रिय उपलब्धिका विषय र नेफ्स्कूनका अध्यक्ष अकूको द्धितीय उपाध्यक्ष हुनुभएकोमा सञ्चारकर्मीहरूसँग विशेष छलफल तथा अन्तरक्रिया कार्यक्रम सम्पन्न भएको छ । 

संघको केन्द्रीय कार्यालय, मीनभवनमा आयोजित कार्यक्रममा मलेसियाको क्वालालम्पुरमा सम्पन्न एशियाली ऋण महासंघ (अकू) को ४५औँ साधारण सभा तथा अकू फोरम २०२६ मा नेपालले प्राप्त गरेका सफलताहरूबारे जानकारी गराइएको हो ।

संघका महासचिव घनश्याम अधिकारीले उपस्थित सञ्चारकर्मी तथा अतिथिहरूलाई स्वागत गर्नुभएको थियो ।  स्वागत पश्चात् संघका उपाध्यक्ष शान्ती अधिकारीले अध्यक्ष चन्द्र प्रसाद ढकाललाई अकूको द्धितीय उपाध्यक्ष हुनुभएकोमा खादा लगाएर औपचारिक रूपमा बधाई तथा शुभकामना व्यक्त गर्नुभएको थियो ।

छलफलका क्रममा संघका प्रमुख कार्यकारी अधिकृत डा. शिवजी सापकोटाले नेपालका दुई साकोस जनउत्थान साकोस (सिल्भर) र मध्यनेपाल साकोस (ब्रोन्ज) ले प्राप्त गरेको अन्तर्राष्ट्रिय ‘एक्सेस ब्राण्ड’ अवार्डबारे विस्तृत विवरण प्रस्तुत गर्नुभएको थियो । साथै, एशियाली ऋण महासंघको साधारण सभाबाट नेफ्स्कूनका अध्यक्ष चन्द्रप्रसाद ढकाल महासंघको द्वितीय उपाध्यक्षमा निर्वाचित भएको विषय तथा रसुवाका बाढीप्रभावित साकोसहरूको पुनर्निर्माणका लागि प्राप्त अन्तर्राष्ट्रिय सहयोगका बारेमा समेत जानकारी गराउनु भएको थियो ।

कार्यक्रमको अन्तिम चरणमा सहभागी सञ्चारकर्मीहरू र नेफ्स्कूनका प्रतिनिधिहरूबीच सहकारी क्षेत्रका समसामयिक विषयमा छलफल तथा अन्तरक्रिया भएको थियो ।

संघका अध्यक्ष चन्द्र प्रसाद ढकालले मन्तव्यका क्रममा नेफ्स्कूनका सदस्य संस्थाहरूले प्राप्त गरेका विभिन्न राष्ट्रिय तथा अन्तर्राष्ट्रिय अवार्डहरू र लामो समयको प्रयासपछि एसियाली ऋण महासंघ (अकू) को सञ्चालक पदमा निर्वाचित हुनु सिंगो नेपालको बचत तथा ऋण सहकारी अभियानकै ठूलो उपलब्धि रहेको उल्लेख गर्नुभयो ।

यसै गरी, पछिल्लो समय नेफ्स्कूनका बारेमा बजारमा फैलिएका केही नकारात्मक टीका–टिप्पणी तथा भ्रामक हल्लाहरूलाई सही नठान्न र विश्वास नगर्न आग्रह गर्नुभयो । आगामी दिनमा अझ प्रभावकारी एवं सशक्त तरिकाले अगाडि बढ्ने प्रतिबद्धता उहाँले व्यक्त गर्नुभयो । साथै, अभियानलाई थप उचाइमा पु¥याउन प्रवद्र्धन भइरहेको सहकारी बैंक गठन प्रक्रिया समेत द्रुत गतिमा अघि बढिरहेको कुरा स्पष्ट पार्दै कार्यक्रमको औपचारिक समापन गर्नुभएको थियो ।