काठमाडौं, १९ भदौ । विश्वव्यापी फैलिएको कोभिडको संक्रमण दर नेपालमा पनि बढिरहेको परिप्रेक्ष्यमा सदस्यहरुको स्वास्थ्य जोखिमलाई ध्यानमा राख्दै संघीय राजधानीको स्वयम्भूस्थित हाम्रो एकीकृत बचत तथा ऋण सहकारी संस्था लि. ले सदस्यहरु लक्षित १ लाख रुपैयाँको स्वास्थ्य बीमा कार्यक्रम शुरु गरेको छ । संस्थाका प्रमुख कार्यकारी अधिकृत योगेन्द्र साउदका अनुसार संस्थाको आमा सेवा केन्द्र–बौद्ध, पीसल्याण्ड सेवा केन्द्र–महाराजगंज, जीविकोपार्जन सेवा केन्द्र–माछापोखरी, शिक्षा सेवा केन्द्र–क्षेत्रपाटी र सहभागिता सेवा केन्द्र–स्वयम्भू गरी ५ वटै सेवा केन्द्रहरुबाट सदस्यहरुको विवरण संकलन गरी सगरमाथा इन्स्युरेन्स कम्पनीमार्फत बीमा गर्न थालिएको हो । सामूहिक जानकारीका लागि सामाजिक सञ्जाल तथा व्यक्तिगत जानकारीका लागि टेलिफोन सम्पर्क मार्फत संस्थाले बीमा कार्यक्रमलाई प्रभावकारी ढंगमा अघि बढाएको उहाँले जानकारी दिनुभयो ।

बीमा कार्यक्रममा सहभागी संस्थाका सदस्यहरुले कोभिड संक्रमण देखिएमा उपचारका लागि रु १ लाख रुपैयाँ प्राप्त गर्ने छन् । कार्यक्रमबारे जानकारी गराउँदा सदस्यहरु उत्साहित मात्र नभई निषेधाज्ञाको अवसरमा समेत सदस्य सम्पर्कलाई निरन्तरता दिएको भन्दै खुसी व्यक्त गरेको प्रमुख कार्यकारी अधिकृत साउदले बताउनुभयो । सदस्यहरु व्यवसाय संचालन गर्न नसकी घरमा सुरक्षित रहेको अवस्थामा सहकारी संस्थाले विभिन्न सेवाहरु उपलब्ध गराएकोले उनीहरुसँग आत्मियता बढेको उहाँको भनाइ छ ।

यसैगरी, साकोसले कोरोना भाइरसले सदस्यको जीवनमा पारेको बहुआयामिक प्रभावबारे अध्ययन गरी सदस्यहरुका स्वास्थ्य र व्यावसायिक सम्भावना र मागको यथोचित सम्बोधनका लागि आवश्यक योजना निर्माणमा सहयोगार्थ सदस्य सर्वेक्षण कार्यक्रम थालनी गरेको छ । यसबाट सदस्यहरुको पेशा तथा व्यवसायमा परेको प्रभावको वस्तुगत विश्लेषण गरी व्यवसाय पुनर्उत्थानको योजना बनाउन सजिलो हुने भन्दै त्यसका लागि तीब्र रुपमा काम अघि बढाएको प्रमुख कार्यकारी अधिकृत साउदले जानकारी गराउनुभयो ।

पहिलो चरण अन्तर्गत हाल प्रत्येक सेवा केन्द्रका कम्तिमा १० प्रतिशत सदस्यहरुको सर्वेक्षण कार्य जारी रहेको भन्दै उहाँले त्यसबाट सदस्यहरुको व्यक्तिगत र व्यावसायिक अवस्थाबारे वस्तुगत जानकारी उपलब्ध हुने बताउनुभयो । आशिंक सञ्चालनमा आएका वा पहिलेभन्दा राम्रो गरिरहेका व्यवसायहरुको पहिचान मार्फत संस्थाले त्यस्ता सदस्यहरुलाई थप सहयोगको कार्यक्रम सहितको खाका व्यवसाय निरन्तरता योजना (बीसीपी) मा  समेट्ने साउदको भनाइ छ । कोभिडबाट अत्यधिक प्रभावित सदस्यहरुको व्यवसाय पुनर्उत्थान वा विविधिकरणका सम्भावनाहरुको खोजीका निम्ति पनि ठोस योजना बनाउन सर्वेक्षण सहयोगीसिद्ध हुने प्रमुख कार्यकारी अधिकृत साउदको दाबी छ ।