काठमाडौं, भदौ २५ । नेफ्स्कूनले कोभिड महामारीको अवस्थामा सहकारीहरुको बार्षिक साधारण सभा आयोजना सम्बन्धी मस्यौदा कार्यविधि आज सहकारी विभाग र राष्ट्रिय सहकारी महासंघलाई बुझाएको छ । नेफ्स्कूनले सबैको चासोको विषयमा सघन गृहकार्य सहित तयार पारेको महामारीमा साधारण सभा सञ्चालन सम्बन्धी नमूना कार्यविधि–२०७७ आज सरोकारवालालाई हस्तान्तरण गरेको हो । नेफ्स्कूनका अध्यक्ष परितोष पौड्यालले विभागका रजिष्ट्रार डा. टोकराज पाण्डे र महासंघका बरिष्ठ उपाध्यक्ष एवम् आइसीए ग्लोवल वोर्ड सदस्य ओमदेवी मल्ललाई मस्यौदा कार्यविधि बुझाउनुभएको हो ।
यसअघि सहकारी विभागले भदौ ५ गते परिपत्र मार्फत सहकारी संघ संस्थाहरुमा अन्तिम वार्षिक लेखा परिक्षण र साधारण सभा आयोजनाको विधि र उपायका सम्बन्धमा सरोकारवालाहरुसँग नियमित अन्तरक्रिया भइरहेको भन्दै उपयुक्त निकास सहितको निचोड सार्वजनिक गर्ने जनाएको थियो । 

कार्यविधि बुझ्दै सहकारी विभागका रजिष्ट्रार डा. पाण्डेले साधारणसभा आयोजनाको अन्योल चिर्ने विषयमा अन्तिम निष्कर्ष निकाल्न नेफ्स्कूनले तयार पारेको कार्यविधिले सहजता हुने दाबी गनुभयो ।

“संघ संस्थाहरुलाई असोज २ गतेसम्म लेखापरिक्षण सक्नुस, त्यस बेला सम्म  साधारण सभाका लागि उपयुक्त निर्देशन जारी गर्छौं, भनेका छौं,” रजिष्ट्रार पाण्डेले भन्नुभयो, “ या संस्थाले साधारण सभा नगरेपनि दण्डित नहुने अवस्था आउनुपर्यो अन्यथा जसरी पनि साधारणसभा सम्पन्न गरेको हुनुपर्यो । महासंघबाट पनि लिखित सुझाव प्राप्त भएको छ, दुवै अध्ययन गरेर विभाग अन्तिम टुङ्गोमा पुग्छ ।” 

नेफ्स्कूनका अध्यक्ष परितोष पौड्यालले सहकारी अभियानको भावना प्रतिबिम्बित हुने गरी भर्चुअल सर्वेक्षणका साथै संघको ३३ औं स्थापना दिवसको अवसरमा सदस्य संघ संस्थालाई जारी गरिएको एकीकृत मार्गनिर्देशन २०७७ मा समावेश बुँदाहरु समेतलाई मिलाएर कार्यविधि तयार पारिएको जानकारी गराउनुभयो । कोभिड १९ को महामारीसँगै संक्रमणको दर फराकिलो भइरहेको परिप्रेक्ष्यमा सहकारीहरुले सदस्यहरुको भौतिक सहभागितामा वार्षिक साधारण सभा आयोजना गर्न सम्भव नभएको सन्दर्भमा नियामक निकायको निर्देशन व्यग्रतापूर्वक पर्खेर बसेका छन् । यसैलाई ध्यानमा राखेर वित्तीय सहकारीहरुको छाता संगठनले सहजिकरण गर्ने उद्देश्यले नमूना कार्यविधि निर्माण गरी हस्तान्तरण गरेको हो । 

यसअघि सहकारी अभियानको छाता संगठन महासंघले पनि विभागलाई साधारण सभा आयोजना सम्बन्धी आफ्ना सुझावहरु बुझाइसकेको बरिष्ठ उपाध्यक्ष ओमदेवी मल्लले जानकारी दिनुभयो । उहाँले भन्नुभयो, “नेफ्स्कूनले सहकारीको बार्षिक साधारणसभाको विषयलाई लिएर तयार गरेको नमूना कार्यविधि अत्यन्त समय सान्दर्भिक, कार्यमूलक र लागु गर्न सकिने अवस्थामा रहेकोले कार्यविधिले समेटेका विषय कार्यान्वयनमा महासंघको सहयोग रहने प्रतिबद्धता व्यक्त गर्दछु ।”

सहकारी ऐन २०७४ अनुसार सहकारी संघ संस्थाहरुले आर्थिक वर्ष समाप्त भएको ६ महिना भित्र वार्षिक साधारण सभा सम्पन्न गरिसक्नुपर्ने छ ।