काठमाडौं, भदौ २६ । काठमाडौंको चन्द्रागिरी नगरपालिका–७ थानकोटस्थित चन्द्रागिरि बचत तथा ऋण सहकारी संस्थाले कोभिड महामारीलाई ध्यानमा राखी आर्थिक वर्ष २०७७/७८ को लागि व्यवासय निरन्तरता योजना (बीसीपी) तयार गरेको छ । संस्थाको यही भदौ २४ गते बसेको सञ्चालक समितिको बैठकले चालु आर्थिक वर्षको लागि व्यवसाय निरन्तरता योजना (बीसीपी) पारित गरेको छ । कोभिड १९ को महामारीको कारण विश्व आक्रान्त भईरहेको बेलामा समग्र विश्वसँगै नेपालको अर्थतन्त्र र वित्तीय बजार पनि नराम्रोसँग प्रभावित भएको भन्दै चन्द्रागिरी साकोसले विषम् परिस्थितिमा संस्था सञ्चालनको विधि र प्रत्रियाहरुको सघन विश्लेषण गरेर बीसीपी तयार गरेको प्रमुख कार्यकारी अधिकृत कृष्ण कुमार श्रेष्ठले जानकारी गराउनुभयो । 

कोरोना भाईरसले  सहकारीका तीन आधार स्तम्भहरुः सदस्य, कर्मचारी र संस्थामा पारेको प्रभाव, सृजना गरेको नयाँ जोखिमहरु र तिनको न्यूनीकरण उपायहरु सहितको दस्तावेजीकरणका रुपमा बीसीपी तयार गरिएको उहाँले बताउनुभयो । संस्थाको ४ वर्षे रणनीतक योजनाको समिक्षा गर्दै विषम परिस्थिमा परिस्कृत कार्यलक्ष्य समेत उक्त योजनाले तय गरेको प्रमुख कार्यकारी अधिकृत श्रेष्ठले अवगत गराउनुभयो । कोभिड १९ को प्रकोपबीच पनि संस्थालाई सुरक्षित सञ्चालन गर्दै सेवा प्रवाहमा निरन्तरताका लागि आवश्यक सबै व्यक्तिगत र संस्थागत सुरक्षा प्रत्याभूतिका उपायहरु बीसीपीले समेटको उहाँले बताउनुभयो । यसमा कोभिड संक्रमणबाट बच्न आवश्यक सुरक्षात्मक तथा निवारणात्मक कृयाकलापमा संलग्न गराउने, सदस्यहरुलाई महामारी लगायतका आकस्मिकताका लागि पूर्व तयारी गर्न लगाउने बीसीपीको मुख्य लक्ष्य रहेको छ ।

कोभिड १९ को असर परीक्षण तथा सदस्यहरुको पछिल्लो वित्तिय सक्षमता पहिचान सम्बन्धी सर्वेक्षण समेत सम्पन्न गरी सोबाट प्राप्त भएको तथ्यांकहरुको आधारमा संस्थाले आर्थिक वर्ष २०७७/०७८ को अनुमानित नगद प्रवाह प्रक्षेपण, ऋणी सदस्यहरुको ऋण फिर्ता गर्ने सक्षमता तथा सदस्यहरुमा कोरोना भाईरसले पारेको आर्थिक, सामाजिक तथा मनौबैज्ञानिक असरको समेत पहिचान गरेको छ । व्यवसाय निरन्तरता योजनाको लागि एशियाली ऋण महासंघ ACCU तथा नेपाल बचत तथा ऋण केन्द्रिय सहकारी संघ लि नेफ्स्कूनको प्राविधिक सहयोग रहेको थियो ।