सर्लाही । जिल्लाको हरिऔनस्थित सगुन बचत तथा ऋण सहकारी संस्था लि.ले रक्तदान कार्यक्रम आयोजना गरेको छ । कोभिड संक्रमणको विषम् परिस्थितिमा रगत अभाव भैरहेको सन्दर्भमा संस्थाले सामाजिक उत्तरदायित्वको कार्यक्रम अन्तर्गत हिजो रक्तदान कार्यक्रम आयोजना गरेको हो । रक्त सञ्चार केन्द्र भरतपुरको प्राविधिक सहयोग एवम् स्थानीय संघ संस्थाहरुको सह आयोजनामा गरिएको कार्यक्रममा १ सय १९ जनाले रक्तदान गर्नुभएको थियो । संस्थाका अध्यक्ष बाबुराम घिमिरेले कार्यक्रमको औपचारिक शुभारम्भ गर्नुभएको थियो । 

कोरोना बढी प्रभावित जिल्लाहरुमध्येको एक सर्लाहीको हरिऔन अवस्थित संस्थाले समुदायको हित अनुुकुल स्वास्थ्य मापदण्डहरुको पालना गरी रक्तदान कार्यक्रम आयोजना गरेको हो । रक्त सञ्चार केन्द्र भरतपुर चितवनको प्राविधिक सहयोगमा निरन्तरको वर्षाका बाबजूद कार्यक्रम सम्पन्न गरिएको संस्थाले जनाएको छ । नेफ्स्कूनको ३३ औं स्थापना दिवसका अवसरमा गत साउन ३२ गते उत्कृष्ट सहकारी संस्था घोषित सगुन साकोसमा हाल १० हजार सदस्य आबद्ध छन् भने १ अर्ब २८ करोड भन्दा बढीको कारोबार छ । २ वटा सेवा केन्द्र रहेको संस्थाले मोबाइल बैंकिङ तथा एटीएम सेवा पनि सञ्चालन गरेको छ । सगुन साकोस हाल नेफ्स्कूनले सञ्चालन गरेको गुणस्तर सुनिश्चितता सम्बन्धी राष्ट्रिय प्रमाणीकरण कार्यक्रम प्रोबेशनमा आबद्ध छ ।