काभ्रे, बनेपा । नेफ्स्कूनका बरिष्ठ उपाध्यक्ष चन्द्र प्रसाद ढकालले मुलुकको सहकारी अभियान र त्यसमा पनि बचत तथा ऋण सहकारी क्षेत्रको विकासमा काभ्रे जिल्लाको अग्रणी भूमिका रहेको बताउनुभएको छ । उहाँले काभ्रे जिल्ला सहकारी र साकोस अभियानको नमूना जिल्ला भएको भन्दै अन्य स्थानका सहकारी र साकोसकर्मीहरुले काभ्रेलाई केन्द्रमा राखेर हेर्ने गरेको र सफल सहकारी अवलोकन भ्रमणका लागि काभ्रेलाई रोज्ने गरेको बताउनुभयो ।

आज नेफ्स्कनू प्रदेश नं ३ कार्यालय बनेपाले आयोजना गरेको नेफ्स्कूनका सदस्य संघ संस्था सम्मान कार्यक्रमका प्रमुख अतिथि नेफ्स्कूनका प्रबक्ता ढकालले नेफ्स्कूनको सेवा व्यवसाय वृद्धिमा समेत काभ्रे जिल्लाको भूमिका महत्वपूर्ण रहेको दाबी गर्नुभयो । नेफ्स्कनू प्रदेश नं ३ कार्यालय बनेपाको व्यवस्थापन उप समिति संयोजक समेत रहनुभएका बरिष्ठ उपाध्यक्ष ढकालले बचत तथा ऋण सहकारीहरुकोअबको ध्यान सूचना प्रविधि मैत्री सहज, सरल र बिशिष्ट सेवा प्रदान गर्नेतर्फ केन्द्रित हुनुपर्ने उल्लेख गर्नुभयो । कोभिड महामारीले पनि सहकारीहरुलाई सूचना प्रविधिमा बिशेष जोड दिदैं सदस्य सेवालाई प्रभावकारी बनाउन अग्रसर गराएको भन्दै उहाँले अरु खर्च कम गरेर भएपनि प्रविधिमा फड्को मार्नुपर्ने आवश्यकता औंल्याउनुभयो ।

नेफ्स्कूनले सबै सदस्यहरुलाई ध्यानमा राखेर नीति, विधि र प्रविधिमा जोड दिएको भन्दै बरिष्ठ उपाध्यक्ष ढकालले सोही कुरा संघले हालै बनाएको ४ वर्षे व्यावसायिक रणनीतिक योजनामा पनि प्रतिविम्बित भएको जानकारी गराउनुभयो । नेफ्स्कूनको गुणस्तर सुनिश्चितता सम्बन्धी स्तरीकरण कार्यक्रम, स्थिरीकरण कोष लगायतमा पनि सबै सदस्यहरुको साथ र सहयोग आवश्यक भएको उहाँले बताउनुभयो । त्यसैगरी, सरकारसँग बहस पैरवी गर्ने विषयमा नेफ्स्कून थप सक्रिय भएर लागेको र ऐन कार्यान्वयनलाई प्राथमिकता दिएको उहाँले बताउनुभयो ।

कार्यक्रममा बागमती प्रदेश बचत तथा ऋण सहकारी संघ लिं का नवनिर्वाचित अध्यक्ष एवम् नेफ्स्कूनका निवर्तमान सञ्चालक सदस्य उद्धव सापकोटाले नेफ्स्नूले नीति, विधि र प्रविधिमा सधै जोड दिदैं आएको भन्दै संघको आगमनसँगै काभ्रेमा सहकारी अभियान थप फस्टाएको बताउनुभयो । उहाँले प्रदेश बचत संघ नेफ्स्कूनसँग मिलेर अघि बढ्ने बताउनुभयो । साकोस अभियानको रकम र कारोबार साकोस अभियानभित्रै हुनुपर्नेमा पनि सापकोटाको जोड थियो । कार्यक्रममा बागमति प्रदेश सहकारी संघका सञ्चालक कृष्ण प्रसाद तिमल्सिना, जिल्ला बचत संघका सल्लाहकार शम्भुलाल श्रेष्ठ लगायत नेफ्स्कून प्रदेश नं ३ कार्यालय बनेपा व्यवस्थापन उपसमिति सदस्यहरु लगायत जिल्ला स्थित विभिन्न साकोसकर्मीहरुको उल्लेख्य सहभागिता थियो । नेफ्स्कून सदस्य सेवा विभाग प्रमुख दुर्गा प्रसाद ढकालले संघको रणनीतिक योजना, अहिलेको कार्यक्रम र भावी योजनाहरुका बारेमा प्रस्तुतिकरण गर्नुभएको कार्यक्रम नेफ्स्कूनका व्यवसाय अधिकृत राम सापकोटाले सञ्चालन गर्नुभएको थियो ।

कार्यक्रममा उत्कृष्ट कारोबारकर्ताका रुपमा सामुदायिक सोकोस, उत्कृष्ट सेयर कारोबारमा ज्योति मिर्मिरे सामुहिक, उत्कृष्ट अन्तरलगानीमा शुलभ साकोस र उत्कृष्ट बचतकर्तामा विन्दवासिनी साकोसलाई नेफ्स्कूनका बरिष्ठ उपाध्यक्ष चन्द्र प्रसाद ढकालले सम्मानित गर्नुभएको थियो । यसैगरी, सिन्धुपाल्चोक क्षेत्रबाट उत्कृष्ट कारोवारकर्तामा शुभ प्रभात साकोस र महिलाहरुद्धारा सञ्चालित साकोसहरुमध्ये लक्ष्मी महिला साकोसलाई सम्मानित गरिएको थियो ।