एजेन्सी । अन्तर्राष्टिय सहकारी महासंघ (आइसीए) का अध्यक्ष एरियल ग्वार्कोको पुस्तक Cooperative Principles in Action सार्वजनिक भएको छ । सहकारी सम्बन्धी विश्वव्यापी चुनौती र अवसरहरु, वातावरणमाथिको मानवीय आक्रमणले निम्त्याएका जलवायु परिवर्तनको विश्वव्यापी समस्या, महिला अधिकार, भविष्यमा कामको प्रवृत्तिमा आउने परिवर्तन, नवीन प्रविधि, वित्तीय विश्वव्यापीकरण, कृषि खाद्य प्रणाली, सञ्चार र दिगो शान्ति आदि जल्दावल्दा विषयवस्तुहरु र सहकारीबीचको तादात्म्य स्थापित गर्ने यत्न पुस्तकमा गरिएको छ । विश्व सहकारी अभियानले माथि उल्लेखित विषयहरुको सम्बोधनमा गरेका कामहरु केलाउने प्रयास पुस्तकमा गरिएको छ । पुस्तक ८ अध्यायमा विभक्त छ । 

स्पेनी भाषामा प्रकाशित पुस्तकमा मुलतः सहकारी प्रारुपले ल्याएको सकारात्मक प्रभाव, अर्थतन्त्र र पृथ्वीका यावत् विषयहरुको सेरोफेरो समावेश गरिएको बताइएको छ । पुस्तकमार्फत लेखक ग्वार्कोले दिगो विकासका लक्ष्यहरु हासिल गर्ने, लैङगिक समानता, शान्ति र मर्यादित श्रम प्रवर्धनको कार्यमा सहयोग पुर्याउने आर्थिक मोडलको रुपमा सहकारीको वकालत गर्नुभएको छ । यसैगरी, अध्यक्ष ग्वार्कोले विश्वभरका सहकारीकर्मीअरुलाई आजका मानवीय चुनौतीहरु र सहकारीबीच निकट र गतिशिल सम्बन्धका आयामहरु स्थापित गर्ने पुनित कार्यमा जुट्न पुस्तकमार्फत आग्रह समेत गर्नुभएको छ । यसैगरी, पुस्तकमा उहाँले सहकारी अभियानको सर्वोच्च विश्व निकायको प्रमुखको रुपमा देखे भोगेका अनुभव र सिकाइहरु पनि समेट्नुभएको बताइएको छ ।

सन् २०१७ मा मलेसियाको राजधानी क्वालालम्पुरमा भएको आइसीएको साधारण सभाबाट अर्जेन्टिनी सहकारीकर्मी ग्वार्को अध्यक्षमा निर्वाचित हुनुभएको थियो । उहाँले २ दशक भन्दा अघि अर्जेन्टिनाको राजधानी ब्युनर्स आयर्सको कोरोनेल प्रिङलेसमा रहेको विद्युत सहकारीबाट यो अभियानको यात्रा प्रारम्भ गर्नुभएको थियो ।