दोलखा । दोलखा जिल्ला बचत संघको रजत वर्ष तथा २२ औं वार्षिक साधारणसभा आज सम्पन्न भएको छ । संघका अध्यक्ष भुमिराज खड्काको अध्यक्षता तथा राष्ट्रिय सहकारी महासंघका उपाध्यक्ष रमेश पोखरेलको प्रमुख आतिथ्यता, राष्ट्रिय सहकारी महासंघका संचालक तथा नेफ्स्कूनका निवर्तमान अध्यक्ष डिबी बस्नेतको विशेष आतिथ्यता तथा बागमती प्रदेश सहकारी संघका महासचिव भिम प्रसाद दहाल, जिल्ला सहकारी संघका अध्यक्ष हेमन्त चौलागाई , जिल्ला बचत संघ दोलखाका पूर्व अध्यक्ष सुदर्शन कार्की लगायतका अतिथि सहभागी हुनुहुन्थ्यो ।

संघका कोषाध्यक्ष तेञ्जीङ शेर्पाले १५ करोड बराबरको आर्थिक प्रतिवेदन पेश गर्नुभयो भने महासचिव अनिल श्रेष्ठले आगामी वर्षको निति तथा कार्यक्रम पेश गर्नुभयो । कार्यक्रममा प्रमुख अतिथि पोखरेलले अबको सहकारी अभियान उत्पादन र व्यवसाय केन्द्रित हुनुपर्ने बताउदै दोलखा जिल्ला सहकारीको अगुवा जिल्ला र बचत संघ मुलुककै नेतृत्वदायी संघ रहेको बताउनुभयो । कार्यक्रमको संचालन उपाध्यक्ष जगत प्रसाद सुवेदीले गर्नु भएको थियो । यस अवसरमा संघको रजत जयन्ती स्मारिका समेत बिमोचन गरिएको थियो ।