जाजरकोट । जिल्लाको खलंगा स्थित सहकारीका प्रतिनिधिहरू बीच नेपाल बचत तथा ऋण केन्द्रीय सहकारी संघ लि. नेफ्स्कून ले चैत्र १४ गते अभिमुखीकरण कार्यक्रम सञ्चालन गरेको छ । नेफ्स्कून संञ्चालक एवंम कर्णाली प्रदेश संयोजक यज्ञ प्रसाद ढकालको अध्यक्षतामा सम्पन्न कार्यक्रमका प्रमुख अतिथि जिल्ला समन्वय समिति जाजरकोटका संयोजक मन बहादुर रावल रहनु भएको कार्यक्रममा संघका महासचिव दामोदर अधिकारी र  भेरी नगरपालिका उप प्रमुख भावना भण्डारी विशेष अतिथि र जिल्ला सहकारी संघ जाजरकोटका सचिव राजु के.सी, नेफ्स्कून कर्णाली प्रदेश उप समिति सदस्य जनक बहादुर शाही, भेरी नगरपालिका सहकारी शाखा प्रमुख केदार बहादुर कार्की लगायत अतिथिहरुको सहभागिता रहेको थियो । 

प्रमुख अतिथि रावलले विगतमा आफु लामो समय सहकारी अभियानमा क्रियाशिल रहेको कारणले सहकारीका गति विधिहरुमा चासो राख्ने गरेको बताउनु भयो । उहाँले भन्नुभयो, “जाजरकोट जिल्लाको सहकारी अभियानलाई नजिक बाट हेरी रहेको छु, विगतको तुलनामा केही सुधार उन्मुख भए पनि सन्तोषजनक प्रगति हुन सकेको छैन । सहकारी क्षेत्रमा जोखिमहरु बढी रहेका छन्, यसको समाधानको लागि सहकारीकर्मीहरु र नियमनकारी क्षेत्रमा संलग्न कर्मचारीहरु थप क्रियाशिल हुनु पर्ने देखिन्छ । नेपालको सहकारी अभियानकै नेतृत्व गरी रहेको नेफ्स्कूनको प्रवेश सँगै जाजरकोटका सहकारीको प्रर्वद्धन र विकासमा ठुलो सहयोग पुग्ने विश्वास लिएको छु ।” 

संघका महासचिव दामोदर अधिकारीले नेफ्स्कूनले स्वदेश तथा विदेशबाट ३२ बर्ष देखि आर्जन गरेको ज्ञान, सिप र प्रविधिमा यस क्षेत्रका बचत तथा ऋण सहकारी संस्थाहरुको संस्थागत विकास गर्न र नेफ्स्कूनका उत्पादन तथा सेवाहरुमा सहकारीको पहुँच बढाउने उद्देश्य सहित कार्यक्रमको आयोजना गरीएको जानकारी गराउनु भयो । जिल्लामा सहकारीहरुको संस्थागत विकास र नेफ्स्कूनसँगको सहकार्य बृद्धिका लागि सहकारीहरुको नेफ्स्कूनसँगको आवद्धता बढाउनुपर्ने धारणा उहाँले राख्नुभयो । 

सञ्चालक यज्ञ प्रसाद ढकालले सहकारी ऐनको मर्म पनि सञ्जालमा आवद्धता अनिवार्य लिनु पर्ने भएकोले सबै साकोसहरुलाई नेफ्स्कूनमा आवद्ध हुन अनुरोध गर्नु भयो । कार्यक्रममा रुकुम पश्चिम र जाजरकोट बाट गरी २५ वटा संस्थाका प्रतिनिधि र अतिथि गरी ४६ जनाको सहभागिता रहेको थियो ।  

कार्यक्रममा नेफ्स्कूनको परिचय, अभियानको वर्तमान अवस्था, अभियानको जोखिमहरू, अभियान जोगाउनको लागि नेफ्स्कूनका कार्यक्रमहरु, संञ्जालको महत्व, नेफ्स्कूनमा आवद्धता र त्यसबाट हुने फाइदाहरु र अभियानको अवको कार्य दिशा सहितको प्रस्तुतिकरण संघका सुर्खेत फिल्ड कार्यलय इन्चार्ज छत्र प्रसाद धमालाले गर्नु भएको थियो भने स्वागत मन्तव्य नेफ्स्कून कर्णाली प्रदेश उप समिति सदस्य जनक बहादुर साहीले र  संञ्चालन नेफ्स्कून अनुगमन अधिकृत पवनजंग मल्लले गर्नु भएको थियो ।