दोलखा । भीमेश्वर नगरपालिकामा रहेको हाम्रो जनकल्याण बचत तथा ऋण सहकारी संस्थ लि. ले स्वास्थ्य सतर्कता अपनाउँदै २५ औं स्थापना दिवस तथा रजत वर्ष विविधि कार्यक्रमका साथ सम्पन्न गरेको छ । रजत वर्षको शुभारम्भको अवसरमा 'हाम्रो जनकल्याणको २५ वर्ष' नामक स्मारिकाको कार्यक्रमका प्रमुख अतिथि भीमेश्वर नगरपालिकाका नगर प्रमुख भरत बहादुर के. सी., विशेष अतिथि जिल्ला सहकारी संघ दोलखाका अध्यक्ष हेमन्त चौलागाई, नेफ्स्कूनका सञ्चालक सदस्य जिवसराज खडका र संस्थाका अध्यक्ष राजन श्रेष्ठले एकै साथ विमोचन गर्नुभयो । सोही अवसरमा राष्ट्रिय व्यक्तित्व विश्व साइकलयात्री पुस्कर शाहलाई दस हजार रुपैयाँ सहित कदर पत्रद्वारा सम्मान गरिएको छ । 

त्यसैगरी ८० वर्ष माथिका जेष्ठ सदस्य नर बहादुर बस्नेत, सरस्वती अधिकारी, तुलसा माया बस्नेत, हरि बहादुर खत्री र अनन्त कुमारी दाहाललाई जेष्ठ नागरिक सम्मान प्रदान गरिएको छ । संस्थाले रजत वर्षको व्यवस्थापनमा हुने खर्च कटौती गरी सो वापतको रकम अपाङ्ग सदस्य ईगुमाया कार्कीलाई हस्तान्तरण गरेको छ । सरकारले २५ जना भन्दा बढीको उपस्थितिमा बैठक भेलाको आयोजना नगर्न आदेश गरेपछि संस्थाको बृहत्तर कार्यक्रमलाई स्थगन गरी सांकेतिक रुपमा रजत वर्षको शभारम्भ गरेको प्रमुख कार्यकारी दिपक बस्नेतले बताउनु भयो । कार्यक्रममा संस्थाका पुर्व अध्यक्षहरु, सल्लाहकार, सञ्चालक, उपसमिति सदस्य लगायत सेयर सदस्यको उपस्थिति रहेको थियो ।