मकवानपुर । हेटौंडा उपमहानगरपालिकाले आगामी आर्थिक वर्ष २०७८र०७९ को लागि २ अर्ब ६० करोड १५ लाख ५२ हजार रुपैयाँको बजेट प्रस्तुत गरेको छ । उपमहानगरपालिकाले आगामी आर्थिक वर्षका लागि उद्योग विकास, सहकारी क्षेत्र र वित्तीय क्षेत्र अन्तर्गतका कार्यक्रम अन्तर्गत कुल रु १ करोड २७ लाख ५० हजार विनियोजन गरेको छ । 

बजेटमा सहकारी

• हेटौंडा उप महानगरपालिकाले नियमित रुपमा कानुन पालना गरी सञ्चालनमा भए बाहेकका सहकारीको कानून बमोजिम संख्या कटौती गरिनेछ ।
• सहकारीको क्षमता अभिवृद्धिको लागि विभिन्न कार्यक्रम सञ्चालन गरिनेछ ।
• सहकारी संस्थाहरु, वित्तीय संस्थाहरु र तालिम प्रशिक्षण दिने सरकारी गैरसरकारी निकायहरुसमेतको समन्वय र सहकार्यमा उद्यमी पहिचान गरी तालिम दिने र वित्तीय संस्थाहरुबाट सहुलितय पुँजी उपलब्ध गराउन प्रयास गर्ने र लागत सहभागितामा उद्यमीहरुलाई उपकरण, औजार उपलब्ध गराई एक घर एक रोजगार नीति अवलम्बन गरिनेछ ।
• गुणस्तरीय सहकारी सेवा प्रवाह गरी सेयर सदस्यहरुलाई रोजगारी र उद्यमी बनाउन रचनात्मक भूमिका खेल्ने सहकारीहरुलाई पुरस्कृत गर्दै लगिनेछ, नयाँ क्षेत्र (विषय) मा सहकारी खोल्न र सहकारी एकीकरण कार्यलाई प्रोत्साहन गरिनेछ ।
• सहकारी संस्थाहरुको सहकार्यमा रोजगारमूलक तालिम सञ्चालन गरी रोजगार र आयवृद्धि गर्ने नीति लिइनेछ ।
• व्यावसायिक उत्पादन र वृद्धि गर्ने सहकारीहरुलाई यन्त्र र उपकरण खरिदमा ५० प्रतिशत अनुदान दिने नीति लिइनेछ, सहकारी संस्थाहरुको अनुगमनलाई प्रभावकारी बनाउँदै लगिनेछ ।