दोलखाको जनसचेतन बचत तथा ऋण सहकारी संस्था लिमिटेडका सञ्चालकहरुकोे क्षमता विकाससम्बन्धी उच्चस्तरीय तालिम CDCC आज सम्पन्न भएको छ । नेपाल बचत तथा ऋण केन्द्रिय सहकारी संघ लि (नेफ्स्कून) को प्राविधिक सहयोगमा काभ्रेको धुलिखेलमा सञ्चालित तालिममा साकोसका पदाधिकारी, सञ्चालक र व्यवस्थापनका कर्मचारी गरी २६ जनाको सहभागिता थियो । 

तामिल सहजीकरण नेफ्स्कूनका बरिष्ठ तालिम अधिकृत बल्लभ तिमल्सिना र तालिम अधिकृत सुमनराज घिमिरेले गर्नुभएको थियो भने नेफ्स्कूनका कामु प्रमुख कार्यकारी अधिकृत प्रकाश प्रसाद पोखरेल, प्रशासन तथा समन्वय विभाग प्रमुख सञ्जयराज तिमल्सिना र प्राचार्य गणेश प्रसाद तिमल्सिनाले अतिथि सहजीकरण गर्नुभएको थियो । पाँच दिने तालिम समापनपछि आयोजित संक्षिप्त कार्यक्रममा राष्ट्रिय सहकारी बैंकका अध्यक्ष के.वी.उप्रेतीले प्रमाण पत्र प्रदान गर्नुभयो । 

तालिम समापन समारोहलाई सम्बोधन गर्नु हुँदै बैंकका अध्यक्ष के.वी. उप्रेतीले समृद्धिका लागि सहकारी संस्थाको महत्वपुर्ण भूमिका हुने भन्दै दोलखा जिल्ला सहकारी क्षेत्रका लागि उर्बर भूमि रहेको बताउनु भयो । यसैगरी जनसचेतन साकोसका पूर्व अध्यक्ष तथा सहकारी अभियन्ता भीम दाहालले तालिमले संस्थाका पदाधिकारी, सञ्चालक र कर्मचारीबिचको एकतालाई बलियो बनाएको दाबी गर्नुभयो ।  

संस्थाका अध्यक्ष हेमन्त चौलागाई संस्थाको नयाँ कार्यसमिति चयन भए पछि आयोजना गरिएको क्षमता विकास तालिमले सहकारी अभियानालाई थप सुधार गरी सञ्चालनका लागि सहयोग मिलेको बताउनु भयो । जनसचेतन सहकारी नेपालको सहकारी अभियानको रोल मोडेल भएको बताउनु हुँदै उहाँले सहकारीका मुल्य, मान्यता र असल अभ्यासलाई थप प्रभावकारी ढंगले अगाडी बढाउनु पर्नेमा जोड दिनु भयो । तालिम उद्घाटन नेफ्स्कून अध्यक्ष परितोष पौडेलले उद्घाटन गर्नु भएको थियो । दोलखाको बैत्यश्वर गाउँपालिका वडा नम्बर ५ मैनापोखरीमा मुख्य कार्यालय रहेको जनसचेतन साकोसले दोलखा सहित काभ्रेपलाञ्चोक, भक्तपुर काठमाण्डौ, ललितपुर जिल्लाका विभिन्न स्थानमा सेवा केन्द्र स्थापना गरी आफ्ना सदस्य सेवा प्रवाह गर्दै आएको छ ।