काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) ले बचत तथा ऋण सहकारी संघ तथा संस्थाहरुको आबद्धतालाई व्यवस्थित गर्न प्रविधिको उपयोग गरी सदस्य सूचना प्रणाली पोट्रल सञ्चालनमा ल्याउने भएको छ । संघको साउन ३२ गते सम्पन्न ३४औं स्थापना दिवसको अवसरमा अध्यक्ष परितोष पौड्यालले एमआइएस पोट्रलको औपचारिक शुभारम्भ गर्नुभएको थियो । 

सहकारी ऐन, नियमावली तथा विनियम बमोजिम बचत तथा ऋण सहकारी सञ्जाल व्यवस्थापनका लागि प्रयोगमा ल्याउन लागिएको  उक्त पोट्रल को जुनसुकै ब्राउजरमा www.mis.nefscun.org.np मार्फत प्रणालीमा आबद्ध हुन सकिनेछ । 

संघमा नयाँ सदस्यहरुको आबद्धताका लागि आवेदन, सदस्यता नविकरण, एकीकरण, खारेजी, विवरणहरु अद्यावधिक गर्ने तथा संघले सञ्चालन गरेको एक्सेस, प्रोबेशन तथा कर्ब्स कार्यक्रमका मासिक प्रगति प्रतिवेदनहरु, बार्षिक अडिट प्रतिवेदन तथा संघलाई दिनु पर्ने सुझावहरु प्रणालीको प्रयोग गरी सम्पन्न गर्न सकिनेछ । प्रणाली मार्फत साधारण सभाको प्रतिनिधिको विवरण अद्यावधिक संस्थामा नै बसेर गर्न सकिन्छ । प्रणाली सञ्चालनका लागि संघले म्यानुअल पनि विकास गरिसकेको छ भने म्यानुअलका आधारमा सदस्य संघ संस्थाहरुले जिम्मेवार कर्मचारी तोकी संघको विनियम बमोजिम प्रतिवेदन संघमा पेश गर्न सक्नेछन् ।