नेफ्स्कून साकोस म्यानेजर्स क्लबको अनुशिक्षण कार्यक्रम आज भर्चुअल सम्पन्न भएको छ । नेफ्स्कूनका कार्यबाहक अध्यक्ष चन्द्र प्रसाद ढकालको प्रमुख आतिथ्यतामा सम्पन्न कार्यक्रमको अध्यक्षता क्लबका संयोजक एवम् मिलिजुली कालिञ्चोक साकोस दोलखाका प्रमुख कार्यकारी अधिकृत ईश्वर न्यौपानेले गर्नुभएको थियो । 

कार्यक्रमका प्रमुख अतिथि नेफ्स्कून कार्यबाहक अध्यक्ष ढकालले जुन सोचका साथ नेफ्स्कून र क्लबका पूर्व संयोजकहरुले यसको परिकल्पना गर्नुभएको थियो त्यसलाई थप व्यापक र विश्वसनीय बनाउने जिम्मेवारी वर्तमान र भावी पदाधिकारीहरुको भएको बताउनुभएको छ ।
म्यानेजर्स क्लब नेफ्स्कूनको मात्र नभई साकोस अभियानको क्लब भएको बताउँदै नेफ्स्कूनका प्रबक्ता समेत रहनुभएका कार्यबाहक अध्यक्ष ढकालले अभियानका व्यवस्थापकहरुको सक्षमता विकासमा नवीनतम अभ्यासहरु भित्राउन क्लब सफल हुनुपर्नेमा जोड दिनुभयो । मानव संशाधनको व्यावसायिकता विकासमा क्लबको बिशेष भूमिकाको अपेक्षा उहाँले गर्नुभयो । उहाँले क्लबको सदस्यता र कार्यक्रमका दृष्टिले व्यापकता र विश्वसनियताको आवश्यकता औंल्याउनुभएको हो । 

कार्यवाहक अध्यक्ष ढकालले केन्द्रीय क्लबले नवगठित प्रादेशिक क्लबहरुलाई यसको पुनित उद्देश्य, कार्ययोजना, आवश्यकता, औचित्य र भावी कदमका बारेमा रायसल्लाह सुझाव र अनुभव हस्तान्तरण गर्नुपर्नेमा जोड दिनुभयो । ‘नेफ्स्कून सिङ्गो अभियान हो, अभियानको कामलाई नतिजामुखी बनाउने, समसामयिक बिषयहरुमा गृहकार्यसहित पृष्ठपोषण गर्नुपर्छ,’ कार्यबाहक अध्यक्ष ढकालले भन्नुभयो, ‘खासगरी साकोस ऐन, स्थिरीकरण र स्तरीकरण कार्यक्रम, साकोस एकरुपता प्रणालीका बिषयमा क्लबमार्फत ऐक्यबद्धता तथा साझा धारणा विकासमा सहयोग अपेक्षित छ ।’कार्यक्रममा नेफ्स्कूनका कामु प्रमुख कार्यकारी अधिकृत प्रकाश प्रसाद पोखरेलले संक्षिप्त मन्तव्य राख्दै अनुशिक्षणमार्फत प्रादेशिक स्तरमा गठित क्लबका अधिकारीहरुलाई अनुभव र प्रशिक्षण मिल्ने बताउनुभयो । 

नेफ्स्कून सदस्य सेवा विभाग प्रमुख दुर्गाप्रसाद ढकाल र प्राचार्य गणेशप्रसाद तिमल्सिनाले क्लबलाई बिशुद्ध व्यावसायिक रुपमा अघि बढाउनुपर्नेमा जोड दिनुभएको थियो ।नेफ्स्कूनको आसन्न साधारण सभालाई सफल बनाउन क्लबको सहयोगको अपेक्षा व्यक्त गर्दै त्यसअघि प्रादेशिक र केन्द्रीय क्लबको बैठक बसी आगामी कार्यदिशाका बारेमा संघलाई सुझाव प्रस्तुत गर्न पनि उहाँहरुले आग्रह गर्नुभयो । क्लबका संयोजक ईश्वर न्यौपानेले क्लबको विगत, पछिल्लो कार्यकलमा भएका गतिविधिहरुबारे जानकारी गराउँदै अब गर्नुपर्ने काम र क्षेत्रसमेटिएको प्रस्तुतिकरण गर्नुभएको थियो । कार्यक्रम सञ्चालन क्लबका निवर्तमान संयोजक एवम् पदेन सदस्य कोलिय देवदह साकोस रुपन्देहीका प्रमुख कार्यकारी अधिकृत बिनोद पराजुलीसँगै क्लबको केन्द्रीय तथा नवगठित प्रादेशिक क्लबका संयोजक र सदस्यहरुको सहभागिता थियो ।