काठमाडौं । सहयात्री बचत तथा ऋण सहकारी संस्था लि. काठमाडौंको १६औं वार्षिक साधारणसभा पूर्व सहकारी मन्त्री माननीय पद्मा अर्यालको प्रमुख आतिथ्यातामा मंसिर १९ गते आइतबार सम्पन्न भएको छ । साधारण सभाको पहिलो सत्रमा राष्ट्रिय सहकारी महासंघका महाप्रबन्धक चित्रा थाम्सुहाङ सुब्बा र सञ्चारकर्मी पूर्व नेपाल सुन्दरी सुगारिका के.सी.ले प्रशिक्षण प्रदान गर्दै उत्प्रेरणामुलक तथा नेतृत्व विकास बारेमा प्रशिक्षण दिनु भएको थियो । 

कार्यक्रममा बालबचतकर्ता बाबुनानीहरुलाई गितार तथा उत्कृष्ट सदस्यहरुलाई सम्मान प्रदान गरिएको थियो । कार्यक्रममा सहकारी बैंकका सञ्चालक सरिता भट्टराईले उद्यमशिलता अभिवृद्धि सम्बन्धी प्रशिक्षण मन्तव्य राख्नु भएको थियो । 

कार्यक्रममा राष्ट्रिय सहकारी महासंघका सञ्चालक टेक प्रसाद चौलागाईंले संस्थाको लेखा समितिमा रिक्त पदमा निर्वाचन संयोजकको भूमिका समेत निभाउदै निर्वाचित लेखा संयोजक विपिन कार्की र सदस्य सकिला निरौलालाई निर्वाचित घोषणा गर्दै सफल कार्यकालको शुभकामना व्यक्त गर्नुभएको थियो । 

प्रमुख अतिथि पूर्व मंत्री माननीय पद्मा अर्यालले सदस्यको सशक्त भूमिका चनाखो भएर निभाउन अनुरोध गर्दै  र संस्थाको सञ्चालक समितिलाई  जिम्मेवारी पूर्वक सञ्चालनको लागि सचेत गराउनु भएको थियो । कार्यक्रममा माननीय पद्मा अर्याललाई नेकपा एमाले को सचिवमा निर्वाचित हुनु भएकोमा बधाई ज्ञापन गर्दै सम्मान गरिएको थियो । 

कार्यक्रममा राष्ट्रिय सहकारी बैंक बानेश्वर शाखाका प्रमुख विष्णु गिरी लगायत अतिथिहरुको उपस्थिति रहेको थियो । ४ हजार ५ सय ९३  सदस्य रहेको सहयात्री साकोसले २७ करोड बराबरको कारोबार गर्दै ५९ लाख २० हजार खुद मुनाफा गर्न सफल भएको छ । 

कार्यकारी अध्यक्ष खेम सुवेदीले सञ्चालन गर्नुभएको कार्यक्रमको अध्यक्षता उपाध्यक्ष नृपेन्द्र श्रेष्ठ ले गर्नु भएको थियो । ग्रामीण लघुबित्त पद्धति अनुशरण गर्दै लघुबित्त कार्यक्रम सञ्चालन गरेको संस्थाले काठमाडौ उपत्यकाभर कार्यक्षेत्र विस्तार, ग्रामीण इलाकामा सेवा केन्द्र थप र विभिन्न सदस्य मैत्री नयाँ कार्यक्रमको घोषणा गर्दै सभा सम्पन्न गरेको छ ।