गुणस्तरीयताका लागि 'प्रोबेसन' रोजिएको अध्यक्ष सुवेदीको भनाइ

काठमाडौं । उदयपुर जिल्लाको बेलंका नगरपालिका ९ स्थित सहयोगी बचत तथा ऋण सहकारी संस्था लि. प्रोबेसन कार्यक्रममा आबद्ध भएको छ । २०६६ साल असोज १८ गते डिभिजन सहकारी कार्यालयमा दर्ता भएको सहयोगी साकोसले असोज २२ गतेबाट कारोबार सञ्चालन गरेको थियो । संस्थालाई वित्तीय रुपमा सुरक्षित, सबल र दिगो बनाउन नेफ्स्कूनले सञ्चालन गरेको साकोसहरुको गुणस्तर प्रमाणीकरणसम्बन्धी पूर्ण तथा व्यावसायिक साकोस विकास कार्यक्रम (प्रोबेसन) मा सहभागी हुने निर्णय भएको अध्यक्ष पुष्पराज सुवेदीले साकोस अवाजलाई जानकारी गराउनुभयो । अध्यक्ष सुवेदीका अनुसार संस्थाको वित्तीय शुद्धता, सुरक्षा, संरचनागत सुधार र विश्वसनीयता वृद्धिको उद्देश्य र अपेक्षासहित गुणस्तरीय सुनिश्चिततासम्बन्धी प्रमाणीकरण कार्यक्रममा आबद्धता जनाउने सहमति सञ्चालक समिति बैठकले गरेको हो । आज साकोसका कार्यालयमा प्रोबेसन कार्यक्रम सम्झौता भएको हो । कार्यक्रममा साकोसका अध्यक्ष सुवेदी, नेफ्स्कूनका बरिष्ठ अधिकृत भरत न्यौपाने, कार्यक्रम अधिकृत मुकेश दाहालसँगै संस्थाका प्रतिनिधिहरुको सहभागिता थियो ।

२८ जनाबाट जनही ५ हजार रुपैयाँका दरले सेयर पुँजी संकलन गरी सुरु भएको सहयोगी साकोसमा हाल ३५ सय सदस्य छन् । सदयहरुलाई आयआर्जनको काममा जोड्नुपर्ने आवश्यकतालाई साकोसले बोध गरेको भन्दै उद्यमशीलतामा सहयोगी योजना तथा सेवा विस्तारलाई प्राथमिकतामा राखिएको अध्यक्ष सुवेदीले जानकारी गराउनुभयो । कोभिडले गर्दा सदस्यहरुको आय आर्जनका विकल्पहरु साँघुरिएका कारण भाखा नाघेको ऋण व्यवस्थापन चुनौती भएको उहाँले बताउनुभयो । बेलंका नगरपालिका भर कार्यक्षेत्र रहेको साकोसको वडा नं ४ लालबजारमा सेवा केन्द्र रहेको छ भने १० जना कर्मचारीहरु कार्यरत छन् । २ करोड ११ लाख सेयर पुँजी रहेको संस्थाले २१ करोड ७६ लाख बढी ऋण प्रवाह गरेको छ ।