शुक्रबार २६ भदौ, २०८३, Fri, 11 Sep, 2026
दोलखा । जिल्लाको चरिकोटमा अवस्थित हाम्रो जनकल्याण बचत तथा ऋण सहकारी संस्था लि. ले भीमेश्वर नगरपालिका र चरिघ्याङ टोल सुधार समितिसँगको साझेदारी तथा समन्वयमा फोहोर वर्गिकरण र व्यवस्थापनका लागि सचेतना कार्यक्रमको सुरुवात गरेको छ ।
अभियानको शुभारम्भ गर्दै भीमेश्वर नगरपालिकाका नगरप्रमुख भरत बहादुर केसीले भीमेश्वरले थालेको फोहोर व्यवस्थापनको अभियानले वातावरणीय संरक्षणमात्र होइन घर, समाज र शहर नै सफा हुनेदेखि फोहोर व्यवास्थापनबाट पैसा आर्जन र रोजगारी समेत सिर्जना हुने भएकाले यसलाई सफल बनाउनु सबै नगरवासीको दायित्व हुने बताउनु भयो । खास गरी शहर र बजार केन्द्रित भई अहिले अभियान थालिएको भएपनि आगामी दिनमा यसलाई नगरभर अभियानका रुपमा थालिने पनि नगर प्रमुख के सी ले बताउनु भयो ।
अभियानमा हाम्रो जनकल्याण बचत तथा ऋण सहकारी संस्था लि. का कर्मचारीहरु र भीमेश्वर नगरपालिकाको फोहोर व्यवस्थापनको जिम्मेवारी लिएको एडिबि फोहोर व्यवस्थापन प्रा. लि. का कर्मचारीहरु स्वयंसेवकका रुपमा हरेक भान्सामा पुगी फोहोर वर्गिकरणबारे जानकारी गराउँदै भान्सामा फोहोर वर्गिकरणका बारेमा तयार गरिएको स्टिकर टाँस्ने कार्यक्रम रहेको छ ।
त्यसैगरी स्वयंसेवकहरुले तीन रङ्गको झोला पनि निःशुल्क वितरण गर्नुहुनेछ । संस्थाका कोषाध्यक्ष अर्जुन कार्कीको अध्यक्षतामा भएको शुभारम्भ कार्यक्रममा भिमेश्वर नगरपालिकाका प्रवक्ता एवम वडा नम्बर ४ का वडा अध्यक्ष हरिबंश चौलागाई, वडा नम्बर ६ का वडा अध्यक्ष नबिन कुमार लामा, भीमेश्वर नगरपालिकाका प्रमुख प्रशासकीय अधिकृत मान बहादुर खडका, इन्जिनियर सुरेश राउत, एडिबि फोहोर व्यवस्थापन प्रालिका सञ्चालक धु्रब बस्नेत, चरिघ्याङ टोल सुधार समितिका अध्यक्ष दाबा लामा लगायत समितिका सदस्य, हाम्रो जनकल्याण साकोसका सञ्चालक, कर्मचारी लगायत स्थानीय घरधनीहरुको उपस्थिति रहेको थियो । यो अभियान एक महिना सम्म चल्ने संस्थाका प्रमुख कार्यकारी अधिकृत दिपक बस्नेतले जानकारी गराउनुभयो ।
