काठमाडौं । मोरङको उर्लाबारी–७ स्थित नारी संकल्प बचत तथा ऋण सहकारी संस्था लि.को संस्थागत विकास तालिम (Institutional Development Training) यही पुस १३ गतेदखि पुस १५ गते आयोजना गरिएको छ । नेफ्स्कूनकी सञ्चालक एवम् साकोसकी उपाध्यक्ष गोमा नेपालको अध्यक्षतामा आयोजित तालिम उद्घाटन तथा समापन सत्रका प्रमुख अतिथि क्रमशः लेटाङ नगरपालिकाका मेयर शंकर राई तथा उर्लाबारी नगरपालिकाका प्रमुख खड्ग फागो रहनुभएको थियो । लेटाङस्थित कृषि विकास बैंक तालिम केन्द्रमा सञ्चालित तालिममा नारी संकल्पका सञ्चालक तथा लेखा सुपरिवेक्षण समिति, सल्लाहकार, विभिन्न विषयगत उपसमिति तथा कर्मचारीहरु गरी २८ जनाको सहभागिता रहेको थियो । 

कार्यक्रममा दुबै नगरपालिकाका मेयरहरुले सहकारी संस्थाहरु सुशासित हुनुपर्नेमा बिशेष जोड दिनुभएको साकोसका व्यवस्थापक चित्र न्यौपानेले साकोस आवाजलाई जानकारी गराउनुभयो । सहकारीमार्फत सदस्य र समुदायको जीवनस्तर परिवर्तन सम्भव भएको बताउँदै नगरप्रमुखहरुले नीति र विधिसम्मत् ढंगले संस्थाहरु सञ्चालनलाई प्राथमिकतामा राखिनुपर्ने धारणा व्यक्त गर्नुभएको थियो । यस्तै उद्घाटन र समापन दुबै सत्रको अध्यक्षता गर्नुभएकी संस्थाकी उपाध्यक्ष गोमा नेपालले संस्थागत तालिममा सिकेका विषयहरुलाई संस्था सञ्चालनमा लागू गर्ने जिम्मेवारी थपिएको बताउनुभयो । उहाँले महिलाहरुद्वारा सञ्चालित जिल्लाकै अब्बल बचत तथा ऋण सहकारीलाई थप सदस्य मैत्री, विश्वसनीय र गुणस्तरीय बनाउने सामुहिक प्रतिबद्धताअनुरुप अघि बढ्ने स्पष्ट पार्नुभयो । नेफ्स्कून सञ्चालक नेपालले भन्नुभयो, ‘तालिमले सुशासित, दिगो र मर्यादित साकोस बनाउने अझ बढी जिम्मेवारी थपिएको छ । हामी त्यसै दिशातर्फ दत्तचित्त भएर लाग्नेछौं ।’

तालिम सहजीकरण नेफस्कूनका बरिष्ठ अधिकृत प्रेमनाथ वाग्ले तथा कार्यक्रम अधिकृत रामकृष्ण भट्टराईले गर्नुभएको थियो । २०६३ सालमा स्थापित नारी संकल्प साकोसमा हाल ३ हजार महिला सदस्य छन् भने १६ करोड बढीको स्थिति विवरण पत्र छ ।