सिन्धुली । सहकारी संघ,संस्थाहरूको लेखा सुपरिवेक्षण समितिलाई आवश्यक ज्ञान र सीप उपलव्ध गराई योग्य लेखा सुपरिवेक्षक बनाउने हेतुले नेफ्स्कूनको  प्राविधिक सहयोगमा २ दिने लेखा सुपरिवेक्षण समितिको क्षमता अभिवृद्धि तालिम पुस २९ गते सिन्धुलीमाढीमा सम्पन्न भएको छ ।

सिन्धुली बचत तथा ऋण सहकारी संघले आयोजना गरेको तालिम संघकी अध्यक्ष तथा राष्ट्रिय सहकारी महासंघ लेखा समिति सदस्य बालकुमारी श्रेष्ठको अध्यक्षता र संघका फिल्ड कार्यक्रम अधिकृत शारदा पहाडीको संचालनमा समापन सत्र सम्पन्न भएको थियो ।

सहकारी संघ संस्थाहरूलाई प्रभावकारी रुपमा सेवा प्रवाह गर्नका लागि लेखा सुपरिवेक्षण समितिले निरन्तर मार्ग निर्देश गर्ने विधि र औजारहरूको बारेमा छलफल तथा अन्तरक्रिया गहन ढङ्गले गरिएको थियो । निरीक्षण, अवलोकन, सोधपुछ, गणना, पुनगणना आदि विधिको प्रयोग गरी समितिले पेश गर्नुपर्ने प्रतिबेदन तयार गर्न समेत तालिममा सिकाइएको थियो ।

संस्था विकासका लागि यो तालिम अति सान्दर्भिक, उपयोगी र  प्रभावकारी रहेको सहभागी सहकारीकर्मी शम्भुप्रसाद दाहाल, उमा खड्का र नन्दलाल श्रेष्ठले बताउनु भयो । संघकी महासचिब मिथुला घिमिरे समेतको सहभागिता रहेको सो तालिममा जिल्लाका लेखा सुपरिवेक्षण समिति, सन्चालक र व्यवस्थापकहरू गरी १८ संस्थाका सहभागीहरुलाई नेफ्स्कूनका बरिष्ठ अधिकृत नविनराज दाहालले सहजीकरण गर्नुभएको  थियो ।