काठमाडौं । मधेश प्रदेशको सिराहा जिल्लास्थित सिरहा नगरपालिकामा आधारशिला कार्यक्रम अन्तर्गत पहिलो चरणमा सहकारीहरुको अवस्था मापनको काम धमाधम भैरहेको छ । हाल सिरहामा रहनुभएका नेफ्स्कूनका कार्यक्रम अधिकृत गौतम साहका अनुसार नगरपालिका भित्र विभिन्न प्रकृतिका गरी ८१ वटा सहकारी संस्था रहेका छन् । तिनीहरुमध्ये केही निष्कृय पनि रहेका छन् । साहले नेफ्स्कूनले सञ्चालन गरेको आधारिशला कार्यक्रम अन्तर्गत पहिलो चरणमा नगरपालिका भित्रका ती सहकारी संस्थाहरु के कस्तो अवस्थामा छन्, उनीहरुको यथार्य विवरण, भौगोलिक अवस्थिति, सञ्चालक समिति, कर्मचारी, कार्यालय, सदस्य, सेवा तथा उत्पादन लगायत सबै विषयमा जानकारी लिने काम भैरहेको बताउनुभयो ।

आधारशिला कार्यक्रम सबै प्रकृतिका सहकारीहरुको विकास, प्रवर्धनका निम्ति नेफ्स्कूनले सञ्चालन गरेको नवीनतम कार्यक्रम हो । यस अन्तर्गत स्थानीय तहका सहकारीहरुको सक्षमता विकासका लागि स्थानीय सरकारहरुसँगको समन्वयमा प्राविधिक सहयोग, शिक्षा, तालिम लगायतका सहयोग गर्ने उद्देश्य रहेको छ । सिरहा नगरपालिका र नेफ्स्कूनबीच २०७८ साल मंसिर २३ गते आधारशिला कार्यक्रम कार्यान्वयन सम्झौता भएसँगै नगरपालिका भित्रका सहकारीहरुको अवस्था मापनको काम सुरु भएको हो ।