काठमाडौं । गोकर्णेश्वर-८, अत्तरखेल, जोरपाटीस्थित सक्षम सञ्जाल बचत तथा ऋण सहकारी संस्था लि. नेफ्स्कूनले सञ्चालन गरेको पूर्ण तथा व्यावसायिक साकोस विकास कार्यक्रम प्रोबेसनमा आबद्ध भएको छ । आज उक्त साकोसको कार्यालयमा आयोजित एक संक्षिप्त कार्यक्रममा प्रोबेसन कार्यक्रम सम्झौता भएको हो । नेफ्स्कूनका सञ्चालक सदस्य न्हुच्छे नारायण मिलन श्रेष्ठ, संघका बरिष्ठ अधिकृत भरत प्रसाद न्यौपाने, संस्थाका अध्यक्ष नवराज पौड्याल, प्रमुख कार्यकारी अधिकृत राजकुमार कार्की लगायत सहभागी कार्यक्रममा सम्झौतामा हस्ताक्षर गरिएको थियो ।

संस्थालाई वित्तीय रुपमा सुरक्षित, सवल र दिगो बनाउन नेफ्स्कूनले सञ्चालन गरेको साकोसहरुको गुणस्तर प्रमाणीकरण सम्वन्धी कार्यक्रम प्रोबेसनमा सहभागी भएको साकोसले जनाएको छ । सहकारी ऐन २०४८ बमोजिम २०६५ साल माघ २७ गते डिभिजन सहकारी कार्यालय काठमाडौंमा दर्ता भई २०६६ साल बैशाख २७ गतेदेखि कार्यालय स्थापना गरी सञ्चालनरत सक्षम सञ्जाल साकोसको गोकर्णेश्वर नगरपालिकाका सबै वडा तथा बुढानिलकण्ठ नगरपालिकाको कपन कार्यक्षेत्र रहेको छ । साकोसमा हाल १३ सय बढी सदस्य छन् भने कुल कारोबार ४४ करोड बढीको छ ।