काठमाडौं । बर्दियास्थित सिको बचत तथा ऋण सहकारी संस्था, डल्फिन बचत तथा ऋण सहकारी संस्था र मौसमी बचत तथा ऋण सहकारी संस्थाबीच एकीकरण भएको छ ।

सिकोको एकीकरण घोषणा सभा सिको साकोसका अध्यक्ष दामोदर अधिकारीको अध्यक्षता र नेफ्स्कूनका अध्यक्ष परितोष पौड्यालको प्रमुख आतिथ्यतामा भएको थियो । घोषणा सभामा नेफ्स्कूनका सञ्चालक माधव प्रसाद जोशी, राष्ट्रिय सहकारी बैंकका सञ्चालक विजया धिताल, लुम्बिनी प्रदेश बचत संघका अध्यक्ष कृष्ण नेपाल र नेफ्स्कूनका प्रमुख कार्यकारी अधिकृत प्रकाश प्रसाद पोखरेलको आतिथ्यता रहेको थियो । 

एकीकरण पछि सिको साकोस डल्फिन सेवा केन्द्र राजापुर न.पा. ४ राजापुर बजार र सिको साकोस मौसमी सेवाकेन्द्र राजापुर न.पा. ६, मानपुरटपराको सेवाकेन्द्र समेत उद्घाटन भएको छ । दुवै सेवा केन्द्रको उद्घाटन नेफ्स्कूनका अध्यक्ष परितोष पौड्यालले गर्नुभएको थियो । 

संस्था एकीकरण घोषणासभाबाट सिको साकोसका अध्यक्ष दामोदर अधिकारीको अध्यक्षतामा १५ सदस्यीय सञ्चालक समिति र जिवन कुमार शाहीको संयोजकत्वमा ३ सदस्यीय लेखा सुपरीवेक्षण समिति  गठन भएको छ भने नवगठित समितिका सदस्यहरुलाई नेफ्स्कूनका अध्यक्ष परितोष पौड्यालले आजै सपथ ग्रहण समेत गराउनुभएको थियो । 

एकीकरणपछि संयुक्त कारोबार सुभारम्भ गरेको सिको साकोसको कुल वासलात ४० करोड १७ लाख ६३ हजार २ सय ९३ पुगेको साकोसका व्यवस्थापक हरिहर पौडेलले साकोस आवाजसँगको कुराकानीका क्रममा जानकारी गराउनुभएको छ ।