काठमाडौं । प्रखर सहकारी अभियन्ता एवम् नेपाल बचत तथा ऋण केन्द्रीय सहकारी संघ लि. (नेफ्स्कून) का बरिष्ठ उपाध्यक्ष चन्द्र प्रसाद ढकाल नयाँ बर्षारम्भ २०७९ को शुभ दिन जनसेवाश्री पदवीबाट विभूषित हुनुहुँदैछ । सरकारको सिफारिशमा उहाँलाई विभूषण प्रदान गर्ने घोषणा गत असोज ३ गते संविधान दिवसको अवसरमा राष्ट्रपति विद्यादेवी भण्डारीबाट भएको थियो । राष्ट्रिय जीवनका विविध क्षेत्रमा महत्वपूर्ण योगदान दिने व्यक्तित्वहरुलाई प्रदान गरिने उक्त सम्मान सहकारी अगुवा ढकाललाई प्रदान गर्ने लागिएको हो । राष्ट्रपति भण्डारीबाट बैशाख १ गते शितलनिवासमा आयोजना हुने सुशोभन समारोहमा उहाँलाई विभूषित गरिदैछ । 

सहकारी सेवाको सत्ताइस वर्ष

अबको करिब २ महिनामा ५५ औं जन्मोत्सव मनाउने तयारीमा रहनुभएका अगुवा सहकारी अभियन्ता ढकालको सक्रिय सहकारी जीवन २६ वसन्त पार गर्दैछ । २०५० सालदेखि उहाँ अनवरत सहकारी क्षेत्रमा क्रियाशील अगुवा अभियन्ता हुनुहुन्छ । दीर्घ सहकारी यात्राका क्रममा ढकालले प्रारम्भिक संस्था, नेफ्स्कून र राष्ट्रिय सहकारी महासंघमा आफ्नो विज्ञता खर्चिनुभएको छ ।

महासंघमा सञ्चालक, नेफ्स्कूनको लेखा सुपरिवेक्षण समिति सदस्य, संयोजक, महासचिवको भूमिका निर्वाह गरिसक्नुभएका उहाँ हाल नेफ्स्कूनको बरिष्ठ उपाध्यक्ष एवम् प्रबक्ता हुनुहुन्छ । नेफ्स्कूनको २८ औं वार्षिक साधारण सभाबाट उहाँ निर्विरोध बरिष्ठ उपाध्यक्ष निर्वाचित हुनुभएको हो । काठमाडौं जिल्ला बचत तथा ऋण सहकारी संघ लि. (कास्कून) मा पनि उहाँ सल्लाहकार हुनुहन्छ । निर्भीक र प्रखर स्वभावका धनी ढकाल सांगठनिक कौशलका लागि कहलिनुहुन्छ । सामाजिक र राजनीतिक क्षेत्रमा पनि उहाँको फराकिलो परिचय स्थापित छ । सहकारीप्रति जन चाख हुर्किनसकेको अवस्थामा पनि ढकाल समुदायको सामाजिक, आर्थिक र साँस्कृतिक रुपान्तरणको पर्यायबाची प्रारुप सहकारी बन्न सक्छ भन्ने आत्मविश्वासका साथ लाग्नुभयो । ‘भिजनरी’ ढकालले उर्जाशील उमेर सहकारीलाई समर्पण गर्नुभयो । नतिजा अभियान र आफ्नो यात्रा दुबै अग्लिदो छ ।

सपाट जिवनमा स्वाद नै के छ र ? समस्या र चुनौती उहाँसँग पनि टाँसिन नआएका होइनन् तर सहकारिताको आर्दश र निष्ठाले तिनलाई निमिट्यान्न पार्यो । ‘अझै लामो यात्रा गर्नुछ,’ बरिष्ठ उपाध्यक्ष ढकालले भन्नुभयो, ‘यात्राका दौरान प्राप्त हुने यी र यस्ता उपलब्धिले भावी चुनौतीहरुको सामना गर्न शक्ति प्रदान गर्छ । यो सम्मानका लागि सरकारप्रति कृतज्ञता व्यक्त गर्दै सहकारी अभियानमा आफ्नो सबै स्रोत, साधन र सामर्थ्य पूर्णत: समर्पण गर्ने प्रण समेत गर्दछु ।’

सहकारीमा लाग्दा पनि आएका अन्य लोभलाग्दा प्रस्तावहरुलाई समेत लत्याएर यसैमार्फत आफु र अभियानलाई उचाइमा उकाल्न सकिन्छ भन्ने निष्कर्षमा उहाँ पुग्नुभयो । ‘लाभका पदहरु अफर नभएका होइनन, ’अगुवा अभियन्ता ढकाल भन्नुहुन्छ, ‘तर पनि सहकारी मोहभंग हुन सकेन । यसैबाट अभियान र आफु अग्लिनुपर्छ भनेर आफुलाई डिस्ट्रयाक्ट गरिनँ ।’ सरकारले उहाँलाई बिशुद्ध सहकारी अभियन्ता कै रुपमा जनसेवा श्री पदकबाट विभुषित गर्न लागेको हो । त्यसैकारण पनि ढकाल साँच्चिकै पुलकित हुनुहुन्छ ।

२०२४ साल जेठ २८ गते पाल्पाको साविक देउराली गाविस ४ दम्बक (हालको रिद्धिकोट गाउँपालिका-२) मा जन्मिनुभएका ढकाल नवलपरासी वर्दघाट सुस्ता पश्चिम वर्दघाट नगरपालिका १ माकरका स्थायी बासिन्दा हुनुहुन्छ । काठमाडौं महानगरपालिका–४ धुम्बाराहीमा अस्थानी बसोबास रहेका ढकालको प्रारम्भिक संस्था बर्दघाटस्थित हाम्रो सुपर बचत तथा ऋण सहकारी संस्था लि. हो ।