जनकपुर । नेपाल बचत तथा ऋण केन्द्रीय सहकारी संघ लि.(नेफ्स्कून) को जनकपुर फिल्ड कार्यालयको आयोजनामा आज जनकपुरधाम उपमहानगरपालिकाका नवनिर्वाचित प्रमुख मनोज कुमार साह र उप–प्रमुख किशोरी साहलाई बधाई एवम् शुभकामना प्रदान गरिएको छ । नेफ्स्कूनका कोषाध्यक्ष दिपक पनेरु, सञ्चालक सदस्य हरेराम प्रसाद र फिल्ड कार्यालय व्यबस्थापन उपसमिति सदस्यहरु सहित फिल्ड कार्यालयका कर्मचारीहरुद्वारा उपमहानगरका नवनिर्वाचित प्रमुख र उपप्रमुखलाई स्वागत गरिएको हो । 

स्वागतका क्रममा नेफ्स्कूनका कोषाध्यक्ष पनेरुले स्थानीय तहको साझेदारीमा सहकारी क्षेत्रको आधारतहदेखि जागरण विकास, प्रवर्धन र सञ्जालीकरण लागि  नेफ्स्कूनले अगाडि सारेको आधारशिला कार्यक्रममा जनकपुरधाम उपमहानगरपालिकासँगको सहकार्य पनि सौहार्दपूर्ण रहने विश्वास लिएको बताउनुभयो । कार्यक्रमका अवसरमा नवनिर्वाचित मेयर मनोज कुमार साहले सहकारी क्षेत्रको विकास र प्रवर्धनका लागि नेफ्स्कूनले चालेका कदमहरु अत्यन्त प्रभावकारी रहेको सुन्दै आएको र उपमहानगर पनि स्थानीय तहमा सहकारीको विकासका लागि नेफ्स्कूनसँग सहकार्य गर्न तयार रहेको प्रतिबद्धता व्यक्त गर्नुभयो । नगरप्रमुख साह नेफ्स्कूनमा आबद्ध शुभारम्भ बचत तथा ऋण सहकारी संस्थाको सदस्य समेत हुुनुहुन्छ ।