काठमाडौं । रौतहटको चन्द्रपुर नगरपालिका ४, चन्द्रनिगाहपुरमा रहेको नव विकास बचत तथा ऋण सहकारी संस्था लि.ले नवनिर्मित भवन उद्घाटन गरेको छ । भवन उद्घाटनसँगै साकोसले आजैबाट सदस्यरुका लागि नयाँ भवनबाटै सेवा सुचारु गरेको छ । नवनिर्मित भवनको उद्घाटन नेफ्स्कूनका अध्यक्ष परितोष पौड्यालले गर्नुभएको थियो । 

प्रमुख अतिथि अध्यक्ष पौड्यालले साकोसले संस्थागत विकास, सुशासन र सुरक्षित वित्तीय कारोबारमा ध्यान दिनुपर्ने बताउनुभयो । उहाँले गुणस्तरयुक्त र विश्वसनीय साकोस निर्माणमा स्तरीकरण कार्यक्रमको योगदान रहेको बताउँदै आगामी दिनमा अझ सबल र सुदृढ साकोस निर्माणका लागि प्रतिबद्ध रहन आग्रहसति संस्थागत बृद्धि विकास र सफलताको शुभकामना व्यक्त गर्नुभयो ।  

रौतहट जिल्ला बचत संघकी अध्यक्ष देवकी नेपालले सदस्यहरुको सेवालाई केन्द्रविन्दुमा राखेर काम गरेकाले नव विकास साकोस सफलताको गतिमा अगाडि बडिरहेको बताउनुभयो ।  उहाँले सुरक्षित र विश्वसनीय वित्तीय सेवामा जोड दिँदै आगामी दिनहरुमा पनि सदस्यहरुमाझ अझ लोकप्रिय बन्न सफल बनोस् भनी शुभकामना प्रदान गर्नुभयो । 

साकोसका अध्यक्ष देववहादुर सापकोटाको अध्यक्षतामा सुरु भएको कार्यक्रममा नेफ्स्कूनका सञ्चालक सदस्य हरेराम प्रसाद, साकोसका उपाध्यक्ष शेख अनवारुल हक, सञ्चालक सदस्यहरु, सेयर सदस्यहरु र स्थानीय सहकारीकर्मीहरुको उपस्थिति रहेको थियो । 

२०६५ साल मंसिर १० गते स्थापित, हाल चन्द्रपुर नगरपालिकाभर कार्यक्षेत्र रहेको नव विकास साकोसमा २८ सय ७० सेयर सदस्य रहेका छन् । २ करोड ५२ लाख सेयर पुँजी, १ करोड ८० लाख जगेडा कोष रहेको उक्त साकोसको कुल वासलात ३० करोड ७० लाख छ । सदस्यहरुलाई प्रविधियुक्त सेवामा जोड्दै उद्यमशिलता विकासमा जोड दिने रणनीति लिएको साकोसका व्यवस्थापक यज्ञ प्रसाईंले जानकारी गराउनुभयो । 

साकोस नेफ्स्कूनद्वारा प्रबद्र्धित एसियाली स्तरको साकोस गुणस्तर सुनिश्चितताको कार्यक्रम एक्सेस र नेपाल स्तरको गुणस्तर सुनिश्चितताको कार्यक्रम प्रोबेसन दुवैमा आबद्ध छ । नेपाल स्तरको प्रोबेसन कार्यक्रम अन्तर्गत साकोसले लगातार तीन पटक सम्म ब्राण्ड प्राप्त गरिसकेको छ भने बचत तथा ऋण सहकारी संस्था सम्बन्धी स्थिरीकरण कोषमा पनि साकोसको सहभागिता रहेको छ । 
साकोसका व्यवस्थापक यज्ञ प्रसाईंले गत सालको प्रदेश स्तरीय उत्कृष्ट व्यवस्थापक पुरस्कार समेत प्राप्त गरिसक्नुभएको छ । 

करिब १० कोठा भएको दुई तले भवन निर्माणका लागि रु. ९० लाख लागत लागेको र अझै सजावटका केही कामहरु बाँकी रहेको साकोसका व्यवस्थापक प्रसाईले जानकारी गराउनुभयो ।