कास्की । नेपाल बचत तथा ऋण केन्द्रीय सहकारी संघ लि.(नेफ्स्कून) को आयोजना र कास्की जिल्ला बचत तथा ऋण सहकारी संघ लि.को व्यवस्थापन सहयोगमा कास्कीका बचत तथा ऋण सहकारी संस्थाहरुका लागि कोपोमिस तालिम प्रदान गरिएको छ । 

श्रावण १६ गते सञ्चालित एक दिवसीय तालिममा कास्कीका विभिन्न बचत तथा ऋण सहकारी संस्थाहरुबाट गरी ६४ जनाको सहभागिता रहेको थियो । 

तालिमको अध्यक्षता कास्की जिल्ला बचत संघका अध्यक्ष भेषराज बराल र प्रमुख आतिथ्यता नेफ्स्कूनका सञ्चालक सदस्य कमला देवी गिरीले गर्नुभएको थियो । 

नेफ्स्कूनकी सञ्चालक सदस्य गिरीले कास्की जिल्लामा सञ्चालित सहकारी संघ संस्थाहरुलाई कोपोमिसमा अनिवार्य संस्थागत विवरण भर्न लगाउने उद्देश्य तालिमको रहेको बताउनुभयो । 

सहकारी विभागद्वारा जारी सूचनाको सबैले पालना गर्नुपर्ने र सहकारी सम्बन्धी वास्तविक तथ्यांक संकलन सबैको जिम्मेवारी भएको हुँदा सबै सहकारी संघ संस्थाहरुले अनिवार्य रुपमा सहकारीका समष्टिगत विवरण भर्न अनुरोध गर्नुभएको थियो । 

बचत सघंका अध्यक्ष भेषराज बरालले समष्टिगत विवरण फाराममा उल्लेख गरिएका विषयहरुसँग सम्बन्धित सम्पूर्ण सूचना भरेर अभियानलाई सहयोग गर्न बचत तथा ऋण सहकारी संस्थाहरुलाई अनुरोध गर्नुभएको थियो । 

बचत सघंका उपाध्यक्ष श्रीकान्त ढुगांनाले स्वागत मन्तव्य राख्नुभएको कार्यक्रम सञ्चालन बचत सघंका कोषाध्यक्ष शेरबहादुर कार्कीले गर्नुभएको थियो ।

कोपोमिस तालिम सहजीकरण नेफ्स्कूनका सूचना प्रविधि अधिकृत राजन सुवेदीले गर्नुभएको थियो । त्यस्तै नेफ्स्कूनका सेवाहरु सम्बन्धमा पोखरा फिल्ड कार्यालयकी इन्चार्ज यमकला सुवेदीले प्रस्तुतीकरण गर्नुभएको थियो भने कार्यक्रम अधिकृत सुर्य प्रसाद तिमिल्सीना, बरिष्ठ सहायक दिप्ती आचार्य र बचत संघका व्यवस्थापक इन्दिरा थापाले व्यवस्थापन सहजीकरण गर्नुभएको थियो । 

सहकारी तथा गरिबी निवारणसम्बन्धी सूचना व्यवस्थापन प्रणाली ९कोपोमिस० कार्यान्वयनका लागि सहकारी विभागले प्रदेश सरकार, स्थानीय तह र सहकारी संघ संस्थाहरुलाई पत्राचार गरी यही मंसिरभित्र सबै सहकारीलाई कोपोमिस सिस्टममा ल्याउने तयारी गरेको छ । 

नेफ्स्कूनले आफ्ना सबै फिल्ड कार्यालयहरु मार्फत कोपोमिसमा सहकारीका डाटा प्रविष्टिका लागि तालिम तथा अभिमुखीकरण कार्यक्रमहरु सञ्चालन गरिरहेको छ भने पछिल्ला दिनहरुमा ठूलो संख्यामा बचत तथा ऋण सहकारी संस्थाहरुले सहकारीका समष्टिगत डाटा प्रविष्टि गरिरहेका छन् ।