भक्तपुर । भक्तपुर जिल्ला बचत तथा ऋण सहकारी संघ लि.ले त्रिवर्षीय आर्थिक समिक्षा प्रस्तुत गर्दै ६३ प्रतिशतले स्रोत बृद्धि भएको जनाएको छ । गत बर्षका तुलनामा यस आ.व. ०७८/०७९ मा ६३ प्रतिशत स्रोत बृद्धि भई संघको कुल वासलात १ अर्व ६९ करोड ४९ लाख भएको र अनुमानमा  ८८  प्रतिशतले प्रगति भएको विवरण संघका कोषाध्यक्ष कान्छाभक्त घजुले प्रस्तुत गर्नुभएको हो । 

संघका अध्यक्ष कृष्ण गोविन्द लाखाजुको अध्यक्षतामा श्रावण १४ गते शनिवार आयोजित बार्षिक समिक्षा तथा चार वर्षीय रणनीतिक व्यावसायिक योजना निर्माण कार्यक्रम मार्फत संघको व्यावसायिक लक्ष्य प्राप्तिको समिक्षा गरिएको थियो ।   

संघका अध्यक्ष लाखाजुले विश्व अर्थतन्त्रमै मन्दी देखिन थालेको र यसको असर नेपालमा पनि परेको कारण बजारमा व्याजदर बढ्नु, बचत निक्षेप संकलनमा कमी हुनु, ऋण माग बढ्नु जस्ता वित्तीय संकटका संकेतहरु भोग्नुपरिरहेको बताउनुभयो । हालसालै प्रकाशित मौद्रिक नीतिले पनि ऋण लगानीलाई निरुत्साहित गर्ने नीति लिएकोले सहकारी संस्थाहरुले पनि ऋण लगानीलाई जोड नदिई वित्तीय संकटको सामना गर्न तयारी अवस्थामा रहनुपर्ने विचार व्यक्त गर्नुभयो ।

२०२ वटा सदस्य संस्था आबद्ध भक्तपुर बचत संघले सदस्यहरुलाई दिँदै आएको सेवालाई थप प्रभावकारी र प्रविधिमैत्री बनाउन नयाँ सफ्टवेयर प्रयोगमा ल्याइएको जनाएको छ । 

विद्यमान तरलता अभावका कारण बचत धेरै फिर्ता हुनुको साथै ऋण माग पनि बढी भएकोले ऋण लगानीमा बृद्धि भई गत बर्षको तुलनामा संघको नाफामा ६ प्रतिशतले बृद्धि भएको र संघ कुल २ करोड ३७ लाख नाफा गर्न सफल भएको संघका कोषाध्यक्ष कान्छाभक्त घजुले जानकारी गराउनुभयो ।  

संघका व्यवस्थापक बालकृष्ण धोजुले संघको बार्षिक अनुमानित बजेट तथा कार्यक्रमबारे प्रस्तुतिकरण गर्दे आगामी चार बर्षमा रु.२ अर्व ४८ करोडको वासलात र ४ करोड १४ लाखको वितीय विवरण र अन्तर सदस्य सहकारी भुक्तानी प्रणालीको विकास समेतको योजना प्रस्तुत गर्नुभएको थियो ।

कार्यक्रममा संघका उपाध्यक्ष हरि बल्लले स्वागत मन्तव्य, सचिव जगनाथ प्रजापतिले कार्यक्रम प्रगति र लेखा सुपरिवेक्षण समितिका संयोजक बालमुकुन्द उपाध्यायले शुभकामना मन्तव्य राख्नुभएको थियो । गोष्ठीमा संघको समिति, उपसमिति र कर्मचारी गरी ३९ जनाको सहभागिता रहेको थियो ।