काठमाडौं । हाम्रो बचत तथा ऋण सहकारी संस्था लि. को आयोजनामा एक्सेस बागमती तेस्रो क्लष्टरमा सहभागी साकोसहरुबीच आज ३०औं कार्यकुशलता तथा सिकाइ व्यवस्थापन कार्यशाला सम्पन्न भएको छ । आयोजक साकोसका अध्यक्ष शम्भूप्रसाद  फुयालको अध्यक्षतामा सञ्चालित कार्यक्रमका प्रमुख अतिथि नेफ्स्कूनका लेखा सुपरिवेक्षण समिति संयोजक नवराज सापकोटा हुनुहुन्थ्यो । 

एक्सेस ब्राण्डिङ कार्यक्रमको तेश्रो बागमती क्षेत्रमा सम्मिलित ६ वटा संस्थाहरुको सहभागितामा उक्त कार्यक्रम सञ्चालन भएको हो । कार्यक्रममा सहभागी संस्थाहरुले आ–आफ्ना संस्थाको पछिल्लो प्रतिवेदनहरु प्रस्तुत गर्दै हालको वित्तीय बजारको समीक्षा गरेका थिए ।

प्रमुख अतिथि नवराज सापकोटाले सहकारीका सिद्धान्त र मुल्य मान्यता प्रति सचेत रहेर बचत तथा ऋण सहकारी सञ्चालन गर्नुपर्नेमा जोड दिनुभएको थियो । उहाँले एक्सेस कार्यक्रमले संस्थाको सबलीकरण गरेको र बर्तमान अवस्थामा एक्सेस आवद्ध संस्थाहरूमा रहेको तरलताले पनि यसको पुष्टि गरेको कुरा ब्यक्त गर्नुका साथै सरकारले सहकारी प्रति गर्नु पर्ने ब्यवहारको चर्चा गर्नुभयो । बचत तथा ऋणको कारोबार गर्ने संस्था अन्य भन्दा अझ बढी संवेदनशील हुनेहुँदा सहकारीमा सुशासन कायम गर्नुपर्नेतर्फ उहाँले सबैलाई सचेत गराउनुभएको थियो । 

कार्यशालाको सहजीकरण नेफ्स्कूनका बरिष्ठ कार्यक्रम अधिकृत प्रेम वाग्लेले गर्नुभएको थियो । हाम्रो साकोसका अध्यक्ष फुयालले संस्थाहरुले संस्थागत सुशासन र दीगोपनका लागि असल अभ्यासहरुमा लाग्नु पर्नेमा जोड दिँदै असल अभ्यासको आदानप्रदानले सिंगो अभियानलाई राम्रो बनाउने विचार व्यक्त गर्नुभएको थियो ।

कार्यशाला संस्थाहरुको प्रगतिको समीक्षा र जोखिम भरित सम्पत्ति र पँुजी पर्याप्तता कोष सम्बन्धी कार्याशाला गरी २ वटा पक्षमा केन्द्रित रहँदै महत्वपूर्ण निश्कर्षहरु सहित समापन भएको थियो ।