काठमाडौं । ज्योतिपुञ्ज बचत तथा ऋण सहकारी संस्था लिमिटेडको १२औंं वार्षिक साधारणसभा शनिवार, भाद्र २५ गते सम्पन्न भएको छ । साकोसका अध्यक्ष नवराज कार्कीको अध्यक्षतामा सम्पन्न साधारणसभाको प्रमुख अतिथि नेफ्स्कूनका बरिष्ठ उपाध्यक्ष चन्द्र प्रसाद ढकाल, विशेष अतिथिमा कोषाध्यक्ष दिपक पनेरु, प्रमुख सल्लाहकार डा. नीरज नारायण जोशी रहनुभएको थियो । 

नयाँ बानेश्वर मुख्य कार्यालय रहेको ज्योतिपुञ्ज साकोसको कुमारी पाटी सेवा केन्द्र र लुभु सेवाकेन्द्रलाई लतिक्ष गरि भाद्र २५ गते एकाइगत साधारणसभा सम्पन्न गरेको हो । नयाँ बानेश्वर मुख्य कार्यालय र गोठाटार सेवा केन्द्रलाई लक्षित गरी भाद्र १८ गते एकाइगत पहिलो साधारणसभा सम्पन्न भएको थियो । साधारणसभामा ५३ प्रतिशत सदस्यको उपस्थिति रहेको निवर्तमान अध्यक्ष नवराज कार्कीले जानकारी गराउनुभयो । 

शनिबार आयोजित साधारणसभालाई सम्बोधन गर्दै नेफ्स्कूनका बरिष्ठ उपाध्यक्ष ढकालले ज्योतिपुञ्ज साकोसले नेफ्स्कूनद्वारा सञ्चालित सेवा तथा कार्यक्रमहरुमा आवद्ध भई नीति, विधि र प्रविधिमा संस्थालाई हिडाउन सफल रहेको बताउनुभयो । लामो समयदेखि संघको अनुगमनमा रहँदै आएको ज्योतिपुञ्जले सदस्यहरुलाई प्रभावकारी वित्तीय सेवा उपलब्ध गराई सुशासित साकोस निर्माणमा जोड दिएको बताउँदै उहाँले यसको निरन्तरता कायम गरी साकोस सुढृढीकरणको अभियानमा लाग्न अनुरोध गर्नुभयो । 

साधारणसभाले नविन श्रेष्ठको अध्यक्षतामा ७ सदस्यीय सञ्चालक समिति र निशिमा आचार्यको संयोजकत्वमा ३ सदस्यीय लेखा सुपरिवेक्षण समिति निर्विरोध निर्वाचित गरेको छ । 

समितिको उपाध्यक्षमा रामेश्वर थापा, सचिव संगित प्रधान, कोषाध्यक्ष सावित्रा कार्की, सदस्यहरुः प्रकाश श्रेष्ठ, बबिता अमात्य, गौरी कुमारी खत्री र लेखा समिति सदस्यहरुमा एलिना थापा र गिता राउतलाई निर्वाचित गरेको छ । 

साधारणसभाले विभिन्न प्रस्ताव उपर छलफल गरि पारित गरेको छ भने सभाले सदस्यहरुलाई १६ प्रतिशत लाभांश दिने प्रस्ताव समेत पारित गरेको निवर्तमान अध्यक्ष कार्कीले जानकारी दिनुभयो । 

३ हजार ५ सय ८४ सेयर सदस्य रहेको यस साकोसमा १० करोड ५२ लाख सेयर पुँजी, ९ करोड ९३ लाख जगेडा कोष १ अर्व ३० करोड बचत र १ अर्ब ५६ करोड कर्जा प्रवाह गरी कुल १ अर्ब ८६ करोडको कारोबार गर्न सफल भएको छ । 

निवर्तमान अध्यक्ष कार्कीले ज्योतिपुञ्जको वर्तमान र भविष्यबारे प्रस्तुतीकरण गर्दै अबको ५ बर्षमा ज्योतिपुञ्जले गरेको परिकल्पनाबारे चर्चा गर्नुभएको थियो । उहाँले सदस्य लक्षित साकोस सेवा र सामाजिक उत्दरदायित्वपूर्ण क्रियाकलापहरुमा जोड दिइने लक्ष्य साकोसको रहेको जानकारी गराउनुभयो । सहकारी ऐन, २०७४ मा भएको व्यवस्थालाई पालना गर्दै नयाँ सञ्चालक समिति निर्वाचित गरि कार्यकारी अध्यक्षको पद हटाइएको समेत जानकारी गराउनुभयो । उहाँले साकोसलाई नीति, विधि र प्रविधिमा सञ्चालन गर्न विभिन्न उपसमितिहरु निर्माण गरी नीति तथा कार्यविधि निर्माण र कार्यान्वयको पक्षलाई समेत प्रभावकारी बनाइएको बताउनुभयो । कार्यक्रममा विशिष्ट अतिथि पनेरु र डा. जोशीले पनि शुभकामना मन्तव्य व्यक्त गर्नुभएको थियो । 

निर्विरोध निर्वाचित सञ्चालक समिति तथा लेखा सुपरिवेक्षण समितिका पदाधिकारी र सदस्यहरुमा हार्दिक बधाई तथा सफल कार्यकालको शुभकामना ।