काठमाडौं । धादिङ र गोर्खा जिल्लामा सञ्चालित बचत तथा ऋण सहकारी संस्थाहरुका लागि धितो मुल्याङ्कन तथा कानुनी प्रक्रिया सम्बन्धी तालिम प्रदान गरिएको छ । नेफ्स्कून धादिङ फिल्ड कार्यालयको आयोजनामा असोज २ र ३ गते सञ्चालित तालिममा दुबै जिल्लाका विभिन्न २१ बचत तथा ऋण सहकारी संस्थाका व्यवस्थापक र ऋण प्रमुख एवम् ऋण उपसमिति संयोजक सहित २८ जनाको सहभागिता रहेको थियो ।

नेफ्स्कून धादिङ फिल्ड कार्यालय व्यवस्थापन उपसमिति सदस्य प्रदिप अधिकारीको अध्यक्षतामा सुरु तालिममा उपसमिति सदस्य तुलसी प्रसाद अधिकारी र धादिङ जिल्ला बचत संघका प्रमुख व्यवस्थापक गोकर्ण दुवाडीको आतिथ्यता रहेको थियो । 

तालिमको सहजीकरण कानुनी परामर्शकर्ता अधिवक्ता शिव कुमार अधिकारीले गर्नुभएको थियो । तालिममा धितो मुल्याङ्कन, उपयुक्त धितो छनोट, धितो मुल्याङ्कनका आधारहरु, धितोको कानुनी कागजात, धितो नाप तथा मुल्याङकन तथा गणना, धितो मुल्याङकनका मापदण्ड र नक्सा जाँच भिडानका प्रयोगात्मक अभ्यास  लगायतका विषयबारे जानकारी गराइएको थियो । 

तालिमको दोस्रो दिन कानुनी प्रक्रिया, ऐनमा भएका व्यवस्थाहरु, धितो बन्धक, कानुनी तबरबाट धितो खराब हुनुको कारण, धितो सकार, ऋण ऐन र ऋण नीति, ऋणका कानुनी काजगातहरु, संस्थाका सदस्य पहिचान फारम लगायत समसामयीक  विषयमा प्रस्तुती एवं  छलफल गरिएको थियो । 

तालिमको समापन उपसमिति सदस्य प्रदिप अधिकारीको अध्यक्षतामा भएको थियो । तालिम व्यवस्थापन सहजीकरण नेफ्स्कून धादिङ फिल्ड कार्यालयका इन्चार्ज शम्भू घिमिरेले गर्नुभएको थियो ।