काठमाडौं । भक्तपुरको कौशलटारमा मुख्य कार्यालय रहेको सन्दुस बचत तथा ऋण सहकारी संस्थाको नवौं वार्षिक साधारणसभा असोज ३ गते सोमबार सम्पन्न भएको छ । साकोसका अध्यक्ष मनोज श्रेष्ठको अध्यक्षता रहेको सभाको उद्घाटन प्रमुख अतिथि नेफ्स्कूनका बरिष्ठ उपाध्यक्ष चन्द्र प्रसाद ढकालले गर्नुभएको थियो । कार्यक्रममा नेपाल सहकारी पत्रकार  समाजका प्रतिनिधि अर्जुन खतिवडा, नेफ्स्कूनका अन्तरलगानी अधिकृत मनोज बुढाथोकी, साकोसका पदाधिकारी, सञ्चालक समिति सदस्यहरु, लेखा समिति सदस्यहरु, स्थानीय सहकारीकर्मी सहित शेयर सदस्यहरुको उपस्थिति रहेको थियो ।  

साधारणसभामा शुभकामना मन्तव्य व्यक्त गर्दै प्रमुख अतिथि ढकालले सहकारी क्षेत्रमा पछिल्लो समय तरलता अभावको समस्या देखा परेको भएपनि यो क्षणिक भएको र सुशासनमा सञ्चालनमा रहेका सहकारी संस्थाहरुमा तुलनात्मक रुपमा समस्या कम देखापरेको बताउनुभयो । सुशासित र स्तरीकृत सहकारी संस्थाको उदाहरण दिँदै उहाँले यदि पानी फट्टिक्क रुपमा सङ्गलो छ भने कसैले धमिल्याउन नसक्ने तर धमिलो पानी थिग्रिएर सतहमा मात्र सङ्गलो देखिएको हो भने जुनसुकै बेला धमिलिन सक्ने भन्दै सहकारीको सिद्धान्त परिपालना गर्दै चलेका सहकारीहरु सबल र दृढ हुने विश्वास व्यक्त गर्नुभयो । 

सभामा साकोसका अध्यक्ष श्रेष्ठले बार्षिक नीति तथा कार्यक्रम प्रस्तुत गर्नुभएको थियो भने लेखा सुपरिवेक्षण समितिका संयोजक अमर बहादुर राउतले लेखा सुपरिवेक्षण समितिको प्रतिवेदन प्रस्तुत गर्नुभएको थियो । १ हजार ५ सय ५० सेयर सदस्य रहेको सन्दुस साकोसको कुल पुँजी रु. ५० करोड रहेको छ । साकोसले ७५ लाख जगेडा कोष, २० लाख ४४ हजार रुपैंया संरक्षित पुँजी फिर्ता कोष र ३९ लाख ५९ हजार रुपैंया शेयर लाभांश कोषमा छुट्टयाएको प्रतिवेदनमा उल्लेख छ । 

कार्यक्रममा साकोसका उत्कृष्ट शेयर सदस्य, उत्कृष्ट सक्रिय सदस्य, उत्कृष्ट कर्मचारी लगायतलाई सम्मान तथा पुरस्कृत गरिएको थियो ।