काठमाडौं । मोरङको उर्लाबारीमा रहेको नारीसंकल्प बचत तथा ऋण सहकारी संस्था लि. को १६औं बार्षिक चुनावी साधारणसभा असोज ३ गते, सोमबार सम्पन्न भएको छ ।

साधारणसभाले गोमा नेपालको अध्यक्षतामा ११ सदस्यीय सञ्चालक समिति र निर्मला घलेको संयोजकत्वमा ३ सदस्यीय लेखा सुपरिवेक्षण समिति सर्वसम्मत निर्वाचित गरेको छ । नवनिर्वाचित अध्यक्ष नेपाल नारीसंकल्प साकोसको प्रतिनिधित्व गर्दै नेफ्स्कूनको सञ्चालक समिति सदस्य समेत हुनुहुन्छ । नेफ्स्कूनमा उहाँको यो दोस्रो कार्यकाल हो । 

नवनिर्वाचित  समितिको उपाध्यक्षमा शोभा चेम्जोङ् पालुङवा, सचिव शोभितमाया तामाङ, सहसचिव यमुना राई, कोषाध्यक्ष चन्द्रा देवि दाहाल र सदस्यहरुमा गिता घिमिरे, निर्मला सिटौला, रुकमणि अधिकारी, अरुणा थापा, देविका सिटौला र अम्बिका देवी कार्की चयन हुनुभएको छ । त्यसैगरी लेखा सुपरिवेक्षण समिति संयोजकमा निर्मला घले र सदस्यहरु चन्द्रा खड्का प्रसाई र सेवन कुमारी बस्नेत चयन हुनुभएको छ । निर्वाचन संयोजकमा मोरङ जिल्ला बचत तथा ऋण सहकारी संघका वरिष्ठ उपाध्यक्ष प्रेम प्रसाद कोइराला रहनुभएको थियो ।  

साधारणसभामा साकोसकी अध्यक्ष सीता कार्कीले चालु आर्थिक वर्षको नीति तथा कार्यक्रम प्रस्तुत गर्नुभएको थियो भने सचिव निर्मला घलेले बार्षिक प्रगति प्रतिवेदन प्रस्तुत गर्नुभएको थियो । कोषाध्यक्ष शोभा चेम्जोङ् पालुङवाबाट कोषाध्यक्षको प्रतिवेदन र लेखा सुपरिवेक्षण समिति सदस्य रिता घिमिरे संयोजकको स्वीकृतीमा लेखा सुपरिवेक्षण समितिको प्रतिवेदन पेश गर्नुभएको थियो । 

३ हजार ८५ शेयर सदस्य मार्फत नारी संकल्प साकोस कुल १६ करोड रुपैंया पुँजी परिचालन गर्न सफल भएको छ । जगेडा कोषमा रु. १ करोड पुर्याउन सफल साकोसले सदस्यहरुलाई १५ प्रतिशत लाभांश समेत स्वीकृत गरेको छ । साधारणसभामा ६९.३१ प्रतिशत सदस्य उपस्थिति रहेको साकोसले जनाएको छ ।

सहकारी एकीकरणलाई तीब्रता दिने नीति अगिकार गरेको नारी संकल्पले सदस्य विस्तारको उद्देश्यसहित यसै बर्षदेखि पुरुष सदस्यहरुलाई पनि साकोसमा सहभागी गराउने निर्णय पारित गरेको छ । साथै आफ्नो कार्यक्षेत्र रहेका उर्लाबारी नगरपालिका, मिक्लाजुङ गाउँपालिका, पथरी शनिश्चरे नगरपालिका र रतुवामाई नगरपालिका भित्र दुई सेवा केन्द्र थप गरी सदस्यहरुलाई नजिकबाट वित्तीय सेवा उपलब्ध गराउने कार्यक्रम अगाडि सारिएको साकोसका व्यवस्थापक चित्र न्यौपानेले जानकारी गराउनुभयो ।