भैरहवा । लुम्बिनी बचत तथा ऋण सहकारी संस्था लिमिटेड सिद्धार्थनगर–१२, रूपन्देहीको २८औं वार्षिक साधारणसभा शनिवार सम्पन्न भएको छ ।  

संस्थाका अध्यक्ष इन्द्र बहादुर थापाको अध्यक्षता तथा सहकारी संस्थाका ज्येष्ठ शेयर सदस्य येम बहादुर रसाइलीको प्रमुख आतिथ्यतामा साधारणसभा सम्पन्न भएको हो । सो अवसरमा बोल्दै प्रमुख अतिथि यम बहादुर रसाइलीले सहकारीको लगानी उत्पादनशील क्षेत्रमा र सदस्यलाई केन्द्रित गरी गर्नुपर्नेमा जोड दिनुभएको थियो । उहाँले सहकारी संस्थामा सदस्य बन्नु पूर्व संस्थाको सञ्चालकहरूको पहिचान गर्ने, संस्थागत आर्थिक गतिविधि हेरेर मात्र सदस्य बन्न जोड दिनु भयो । साथै सहकारीका सदस्यहरूको आयस्रोत वृद्धिका साथै संस्थामा आवद्ध सबै सदस्यहरूको अर्थिक रूपमा विकास गराउनमा सहकारी संस्थाको ठुलो भूमिका रहने बताउनु भयो ।

साधारणसभामा सिद्धार्थनगर नगरपालिकाका सहकारी अधिकृत कमलकान्त खनाल र राष्ट्रिय सहकारी बैंक लि. भैरहवा शाखा प्रमुख आलोक शिवाकोटीको विशिष्ट आतिथ्यता रहेको थियो । सो सभामा सहकारी अधिकृत कमलकान्त खनालले वर्तमान अवस्थामा सहकारी र सहकारी संस्थाका शेयर सदस्यहरूको साधारणसभामा भूमिका, तथा  विभागबाट जारी निर्देशिकाका बारेमा प्रशिक्षण मूलक प्रस्तुती गर्नु भएको थियो । 

कार्यक्रम सञ्चालन संस्थाका प्रबन्धक राम प्रसाद बरालले गर्नु भएको थियो । सभामा संस्थाका अध्यक्ष, पदाधिकारी तथा सञ्चालहरूद्वारा सहकारीको तर्फबाट संस्थाका सत्तरी वर्ष भन्दा माथिका ३२ जना ज्येष्ठ शेयर सदस्यहरूलाई सम्मान पत्र र दोसल्लाद्वारा सम्मान गरिएको थियो ।  सोही सभामा शेयर सदस्य पल्लवी कार्कीलाई २०७८ सालको नर्सिङ तर्फ र शेयर सदस्य कृष्णचन्द्र बस्यालकी सुपुत्री एलिजा बस्याललाई कक्षा ११ र १२ मा उत्कृष्ट अंक ल्याएकोमा नगद तथा सम्मानपत्रबाट सम्मान गरिएको थियो । 

सभाले संस्थाको चालु आ.व. ०७९।०८० का लागि २५ करोड ५५ लाख ५० हजारको वजेट समेत सर्वसम्त पारित गरेको थियो । सभामा प्रस्तुत गरिएको वार्षिक बजेट, नीति तथा कार्यक्रम र लेखा सुपरिवेक्षण समिति संयोजकबाट प्रस्तुत आर्थिक प्रतिवेदन तथा आ.व.०७८।०७९ को वार्षिक लेखा परीक्षण प्रतिवेदन सर्वसम्मत रुपमा पारित गरिएको थियो । संस्थाका प्रबन्धक राम प्रसाद बराललाई सम्मान पत्रले सम्मान गरिएको थियो ।