बर्दिया । जिल्लाको ठाकुरबाबा न.पा.५, शाहीपुरमा सञ्चालित सगुन बचत तथा ऋण सहकारी संस्था लि.को एकीकरण पछिको दोस्रो साधारणसभा असोज २९ गते शनिबार सम्पन्न भएको छ । २०७७ सालमा उमङ्ग महिला कृषि सहकारी संस्थासँग एकीकरण गरेको सगुन साकोसमा कुल ६ हजार ६ सय ४९ शेयर सदस्य र १६ करोड ६५ लाखको वासलात रहेको छ । 

साकोसका अध्यक्ष भिक्खुराम थारुको अध्यक्षतामा सुरु भएको सभाको उद्घाटन प्रमुख अतिथि नेफ्स्कूनका महासचिव दामोदर अधिकारीले गर्नुभएको थियो । सभामा बर्दिया जिल्ला सहकारी संघ लि. का अध्यक्ष नवराज ढुङ्गाना, ठाकुरबाबा न। पा. ५ नम्बर वडा कार्यालयका वडा अध्यक्ष शम्भु प्रसाद थारु, राष्ट्रिय सहकारी बैंक लि. भूरिगाउँ शाखाका शाखा प्रमुख किरण खत्री लगायत साकोसका पदाधिकारी, सञ्चालक र शेयर सदस्यहरुको उपस्थिति रहेको थियो ।

साधारणसभामा शुभकामना मन्तव्य व्यक्त गर्दै प्रमुख अतिथि नेफ्स्कूनका महासचिव अधिकारीले सहकारीमा शेयर सदस्यहरुको नियमित बचतले ठूलो महत्व राख्ने हुँदा सहकारीमा नियमित बचत गर्न छोड्न नहुने बताउनुभयो । सदस्यहरुले आज गरेको नियमित बचत बुढेसकालको सहारा भएको बताउँदै प्रमुख अतिथि अधिकारीले बंगलादेशको रिक्सा चालकले गरेको सानो बचतको उदाहरण प्रस्तुत गर्नुभएको थियो । गरिबीका कारण आफ्नो धार्मिक पर्व मनाउन र घरपरिवारमा खुसीयाली ल्याउन नसकेको एक सर्वसाधारणले दैनिक पिउने चियामा कमी गरी सो रकम चिया पसलेलाई जम्मागर्न गरेको अनुरोध र संकलित रकमले घर परिवार, साथीभाई र सहकारी स्थापना गर्ने सम्मको यात्रामा पुर्याएको योगदानको प्रशंसनीय उदाहरुणमार्फत सदस्यहरुलाई बचतको महत्वबारे प्रष्ट्याउनुभएको थियो । 

साधारणसभामा साकोसका सचिव रामकुमार थारुले गत आ.व.को प्रगति प्रतिवेदन र चालु आ.व.को नीति तथा कार्यक्रम प्रस्तुत गर्नुभएको थियो । कोषाध्यक्ष राधा थारुले आर्थिक प्रतिवेदन प्रस्तुत गर्दै १३ करोड १९ लाख ७१ हजार रुपैंया बचत संकलन, १३ करोड ५९ लाख ९४ हजार रुपैंया ऋण लगानी गर्न सफल भएको र कुल २२ लाख ५४ हजार नाफा आर्जन गरेको जानकारी गराउनुभयो । 

सभामा लेखा सुपरिवेक्षण समितिका संयोजक वीर बहादुर थारुले लेखा सुपरिवेक्षण समितिको प्रतिवेदन प्रस्तुत गर्नुभएको थियो । 

साधारणसभामा उत्कृष्ट शेयर खरिदकर्ता र उत्कृष्ट कर्मचारीलाई सम्मान गरिएको थियो । 

जोखिममा आधारित साकोस सुपरिवेक्षण कार्यक्रम कर्ब्समा आबद्ध सगुन साकोसले साकोस स्तरीकरणको कार्यलाई जोड दिइने जनाएको छ । साकोसमा ९ सय बालबचतकर्ताले नियमित बचत गर्दै आइरहेको पनि साकोसका व्यवस्थापक ललित कुमार थारुले जानकारी गराउनुभयो ।