काठमाडौं । काभ्रेको खोपासीमा मुख्य कार्यालय रहेको बिन्धवासिनी बचत तथा ऋण सहकारी संस्था लि.को सञ्चालकहरुको क्षमता अभिवृद्धि तालिम आजबाट सुरु भएको छ । ललितपुरको गोदावरीस्थित एक होटलमा आयोजित तालिमको उद्घाटन नेफ्स्कूनका अध्यक्ष परितोष पौड्यालले गर्नुभएको थियो । 

तालिममा सञ्चालक समितिका पदाधिकारी, सदस्यहरु, लेखा सुपरिवेक्षण समितिका संयोजक, सदस्यहरु, विभिन्न उपसमितिका सदस्यहरु र व्यवस्थापन समूह गरी ३५ जनाको सहभागिता रहेको छ । 

तालिम शुभारम्भका अवसरमा शुभकामना मन्तव्य राख्दै प्रमुख अतिथि नेफ्स्कूनका अध्यक्ष परितोष पौड्यालले सञ्चालक समितिको क्षमता अभिवृद्धि तालिम एशिया महादेशमा साकोस अभियान सिकाइको लागि महत्वपूर्ण तालिम रहेको स्पष्ट पार्नुभयो । उहाँले विन्धवासिनी साकोस १४ हजार बचत तथा ऋण सहकारीको गन्तव्य संस्था तथा साकोस अभियानले विश्वास गरेको संस्था रहेको चर्चा गर्दै साकोस नीति, विधि र प्रविधिबाट सञ्चालित हुनुपर्नेमा जोड दिनुभयो । अध्यक्ष पौड्यालले विधि भनेको विश्व ऋण परिषद्बाट प्रतिपादन गरीएको ४ सिद्धान्तहरुः १) सदस्य सुरक्षा २) सुशासन प्रवर्धन ३) प्रभावकारी सञ्चालन तथा कुशल व्यवस्थापन ४) सञ्चालन सम्वन्धि आधारभूत पक्षहरुको परिपालन गर्नु रहेको जानकारी गराउनुभयो ।  उहाँले समस्याको समाधान नीति मार्फत तथा नीतिगत सर्वोच्चता कायम गरी गर्नुपर्दछ र विधि र नीतिको परिपालना गराउने माध्यम प्रविधि रहेको उल्लेख गर्नुभयो । 

कार्यक्रममा शुभकामना मन्तव्य राख्दै साकोसका सल्लाहकार प्रदिप थापाले सुशासित साकोस सञ्चालनमा जोडदिनुपर्ने, नीति, विधि र प्रविधिमा निपूर्ण हुनुपर्ने र सदस्य शिक्षा तथा तालिमका कार्यक्रमहरुलाई निरन्तर अगाडि बढाउनुपर्नेमा विशेष ध्यान दिन अनुरोध गर्नुभयो । 

अध्यक्ष शान्त कुमार श्रेष्ठले सहकारी निरन्तरको सिकाई भएको र सिकेको ज्ञान सीप व्यवहारमा उतारेर अगाडि बढ्नसके साकोसको प्रभावकारी सञ्चालन सम्भव हुने बताउनुभयो । 

नेफ्स्कूनको प्राविधिक सहयोगमा कार्तिक १६ देखि १९ गतेसम्म सञ्चालन हुने तालिमको सहजीकरण नेफ्स्कून शिक्षा तथा स्रोत केन्द्रका प्राचार्य सञ्जयराज तिमिल्सीना र तालिम अधिकृत सुमन घिमिरेले गर्नुहुनेछ । 

साकोसका अध्यक्ष शान्त कुमार श्रेष्ठको अध्यक्षतामा आयोजित तालिम शुभारम्भ कार्यक्रमको सञ्चालन साकोसका सचिव डोरेन्द्रराज सापकोटाले गर्नुभएको थियो । 

विन्धवासिनी साकोसको असोज पहिलो साता सम्पन्न २९ औं बार्षिक साधारणसभाबाट शान्त कुमार श्रेष्ठको अध्यक्षतामा नयाँ सञ्चालक समिति चयन भएको थियो । काभ्रेपलाञ्चोक, काठमाडौं र भक्तपुर (सूर्यविनायक नगरपालिका) कार्यक्षेत्र बनाई १५ वटा सेवा कार्यालय मार्फत ५५ हजारभन्दा बढी सदस्यहरुलाई वित्तीय तथा अन्य सेवा उपलब्ध गराउँदै आएको साकोसले राष्ट्रिय तथा अन्तर्राष्ट्रिय पहिचान स्थापित गर्न सफल भएको छ । कारोबारका हिसाबले समेत अब्बल बन्दै गइरहेको विन्धवासिनी साकोसमा ९५ कर्मचारी कार्यरत छन् ।