काठमाडौं । कास्की जिल्ला बचत तथा ऋण सहकारी संघ लि.ले आवद्ध सदस्य संस्था र व्यवस्थापकलाई प्रदान गरिने उत्कृष्टताको सम्मान स्वरुप यस बर्ष गौरीशंकर साकोस र आस्था साकोसका व्यवस्थापक नारायण आचार्यलाई सम्मानित गरेको छ । बचत संघले २०७४ सालबाट बखान उत्कृष्ट सहकारी अवार्ड र राईफाईसन उत्कृष्ट सहकारी व्यवस्थापक पुरस्कार तथा सम्मानको कार्यक्रम शुरु गरेको हो । 

संघको पौष २९ गते शुक्रबार सम्पन्न २२औं बार्षिक साधारणसभाका अवसरमा प्रमुख अतिथि नेफ्स्कूनका महासचिव दामोदर अधिकारीले गौरीशंकर साकोसलाई बखान उत्कृष्ट सहकारी अवार्ड, २०७९ र आस्था साकोसका व्यवस्थापक नारायण आचार्यलाई राईफाईसन उत्कृष्ट सहकारी व्यवस्थापक पुरस्कार, २०७९ बाट सम्मानित गर्नुभएको थियो । 

बचत संघका निर्वतमान अध्यक्ष सुदिप ढकालले शुरु गर्नुभएको सो अवार्ड २०७४ सालदेखि प्रदान गर्न थालिएको भएपनि बीचका दुई बर्ष कोभिडका कारण रोकिएको संघका अध्यक्ष भेषराज बरालले जानकारी गराउनुभयो । 

संघले शुरुको बर्ष २०७४ सालमा फेवा बचत तथा ऋण सहकारी संस्था लि. लाई  बखान उत्कृष्ट सहकारी अवार्ड र पोखरा रोयल साकोसका प्रमुख प्रवन्धक मिलन ढकाललाई राईफाईसन उत्कृष्ट सहकारी व्यवस्थापक पुरस्कारबाट सम्मानित गरेको थियो । त्यसैगरी २०७५ सालमा बखान उत्कृष्ट सहकारी अवार्डबाट जनसेवा साकोस र  राईफाईसन उत्कृष्ट सहकारी व्यवस्थापक पुरस्कारबाट संगम साकोसका व्यवस्थापक अपिल कोइरालालाई सम्मानित गरिएको थियो । २०७८ सालमा राईफाईसन उत्कृष्ट सहकारी व्यवस्थापक पुरस्कारबाट फेवा साकोसका व्यवस्थापक हरिभक्त पौडेल र बखान उत्कृष्ट सहकारी अवार्डबाट संगम साकोसलाई पुरस्कृत गरिएको थियो । संघले राईफाईसन उत्कृष्ट व्यवस्थापक पुरस्कार राशी रु. ५ हजार र सम्मान तथा कदर पत्र र बखानसिंङ उत्कृष्ट सहकारी अवार्डमा दोसल्ला तथा प्रशंसा पत्र प्रदान गर्ने गरेको छ । 

पौष २९ गते सम्पन्न संघको २२औ वार्षिक साधारणसभा संघका अध्यक्ष भेषराज बरालको सभापतित्व तथा नेफ्स्कूनका महासचिब दामोदर अधिकारीको प्रमुख आतिथ्यतामा भएको थियो । 

सो अबसरमा अध्यक्ष द्वारा प्रस्तुत प्रतिबेदन, कोषाध्यक्ष बाट प्रस्तुत प्रतिबेदन सचिबको प्रतिबेदन र लेखासमितिका संयोजकबाट प्रस्तुत प्रतिबेदन माथी छलफल गरी पारीत गरिएको थियो । 

संघमा हाल २ सय ९४ संस्था आवद्ध छन् । रु. १४ लाख ७० हजार शेयर पुँजी रहेको संघको कुल सम्पत्ती २६ लाख पुगेको छ । संघले चालु आ.व.मा सदस्य संस्थाहरुका लागि क्षमता अभिबृद्धि तालिम, पर्ल्स अनुगमन तथा मूल्यांकन तालिम, जिल्ला महिला गोष्ठी, सहकारी अभिमुखीकरण, सहकारी ऐन तथा नियमावली विषयक अन्तरक्रिया लगायतका कार्यक्रमहरु योजनामा राखेको छ । संघले यसै बर्ष आबद्ध सदस्य संस्थाहरुको वित्तीय विवरणसहितको डाइरेक्टरी समेत प्रकाशन गरि वितरण गरेको जनाएको छ ।