सिरहा । नेफ्स्कून सेवा केन्द्र लाहानको आयोजनामा भाखा नाघेको ऋण ब्यवस्थापन तालिम सञ्चालन भएको छ । सिरहाको लाहानमा चैत्र १२ र १३ गते सञ्चालित तालिममा सिरहा र सप्तरीका विभिन्न ५३ बचत तथा ऋण सहकारी संस्थाका पदाधिकारी, सञ्चालक सदस्य, ब्यवस्थापक र कर्मचारी गरी ५५ जनाको सहभागिता रहेको थियो । 

जिल्ला बचत संघ सप्तरीका अध्यक्ष भवानी प्रसाद चौधरीको अध्यक्षतामा आयोजित तालिमको उद्धाटन जिल्ला बचत संघ सिरहाका कोषाध्यक्ष देव कुमारी लामाले गर्नुभएको थियो । 

कोषाध्यक्ष देव कुमारी लामाले तालिमले संस्थामा ऋणलाई सुरक्षित लगानी गर्ने र समस्यामा परेका ऋणहरुलाई कसरी असुली गर्न सकिन्छ, समस्यमा परिहालेमा कस्तो तरिकाले असुली गर्न सकिन्छ कस्तो अवस्थालाई भाखा नाघेको ऋण हुन्छ, त्यसका कानुनी प्रक्रियाहरु के के अपनाउनु पर्छ भने कुराहरु यस तालिमवाट सक्षम बनाउन सहयोग गर्ने विश्वास लिएको बताउनुभयो । 

तालिमको सहजीकरण नेफ्स्कूनका तालिम अधिकृत रविन्द्र श्रेष्ठले गर्नुभएको थियो भने आवश्यक समन्वय नेफ्स्कून सेवा केन्द्र लाहानका ईन्चार्ज संजय कुमार कर्ण र कर्मचारी गोविन्द प्रसाद प्रभाकरले गर्नुभएको थियो ।