सिन्धुली । नेफस्कून सिन्धुली सेवा केन्द्रको आयोजना तथा सिन्धुली बचत तथा ऋण सहकारी संघको व्यवस्थापनमा एक दिवसीय ऋण लगानी सदुपयोगिता, अनुगमन तथा मूल्याङ्कन गोष्ठी सम्पन्न भएको छ । सिन्धुलीमाढी स्थित कमलामाई पार्टी प्यालेसमा बुधबार आयोजित गोष्ठीमा बचत संघकी अध्यक्ष मिथुला घिमिरेको अध्यक्षता र वागमती प्रोस्कुनका सञ्चालक एवम् बचत संघका उपाध्यक्ष कृष्णहरि कोइरालाको प्रमुख आतिथ्यता रहेको थियो । 

कार्यक्रममा सहभागी अतिथि जिल्ला सहकारी संघ सिन्धुलीका सञ्चालक शम्भु दाहाल एवम् बचत संघका सञ्चालक पुरुषोत्तम पहाडीले अहिलेको समसामयिक तरलता व्यवस्थापन तथा ऋण लगानीको वर्तमान अवस्थाको बारेमा महत्वपूर्ण विचार राख्नुभएको थियो । गोष्ठीको सहजीकरण नेफ्स्कूनका तालिम अधिकृत रविन्द्र श्रेष्ठले गर्नुभएको थियो । गोष्ठीमा विभिन्न साकोसबाट गरी ३५ जना साहकारीकर्मीहरु सहभागी थिए ।

कार्यक्रममा सहभागी ब्यवस्थापकद्वय सम्झना आचार्य र नवीन कार्कीले गोष्ठी अत्यन्त समयसान्दर्भिक, प्रभावकारी र उपलब्धीमूलक रहेको विचार ब्यक्त गर्नुभएको थियो । 
बचत संघका कार्यक्रम अधिकृत शारदा पहाडीद्वारा सञ्चालित गोष्ठीको उद्घाटन सत्रमा नेफ्स्कून सिन्धुली सेवा केन्द्रका इन्चार्ज श्याम बुढाथोकीले स्वागत मन्तव्य राख्नुभएको थियो ।