दोलखा । हाम्रो जनकल्याण बचत तथा ऋण सहकारी संस्था लि को आयोजना र श्री शिवपुराण धन धान्याञ्चल पितृ उद्धार विराट ज्ञान महायज्ञ एवम् धार्मिक अनुष्ठान कार्यक्रमसँगको समन्वयमा ६६ औं राष्ट्रिय सहकारी दिवसका अवसरमा खुला रक्तदान सम्पन्न भएको छ । नेपाल रेडक्रश सोसाइटी जिल्ला शाखा दोलखा र च्छोरोल्पा अस्पताल प्रालिको प्राविधिक सहयोगमा खुला रक्तदान सम्पन्न भएको हो । रक्तदानमा २६ महिला सहित ५९ जनाले रक्तदान गर्नुभएको थियो ।

ललितपुर महानगरपालिकाका नगर प्रमुख चिरिबाबु महर्जन, भिमेश्वर नगरपालिकाका नगर प्रमुख ईश्वर नारायण मानन्धर र महायज्ञ समारोहका आकर्षण जननी शिवशक्ति स्वरुपा माताश्री कल्याणीले रक्तदातालाई ब्लड व्याग दिएर रक्तदानको उद्घाटन गर्नुभएको थियो । रक्तदातालाई हौसला दिंदै भिमेश्वर नगरपालिकाका नगर प्रमुख ईश्वर नारायण मानन्धरले गाउँगाउँमा पुगेर सहकारीले वित्तीय पहुँचका लागि मात्र काम गरिरहेका छैनन् सामाजिक कार्यमा समेत महत्वपूर्ण भूमिका खेलेको सन्देश दिएको बताउँदै सहकारीका शेयर सदस्यलाई उत्पादन, उद्यमशीलता र बजारीकरणमा नगरपालिकाले सक्दो सहयोग गर्ने बताउनुभयो । 

संस्थाका अध्यक्ष राजन श्रेष्ठले हरेक वर्ष वार्षिक योजनामा राखेर संस्थाले रक्तदान आयोजना गर्दै आएको बताउँदै सदस्यका हरेक पक्षलाई सम्बोधन गर्ने गरी हाम्रो जनकल्याण साकोसले गतिविधि सञ्चालन गर्न सक्ने बताउँदै त्यसका लागि सबै तहका सरकार र सामाजिक संस्थाहरुलाई समन्वय र सहकार्यका लागि आग्रह गर्नुभयो ।