दोलखा । भावी सञ्चालक तथा सहकारीमा कुशल नेतृत्वको विकास गर्ने उद्देश्यका साथ हाम्रो जनकल्याण बचत तथा ऋण सहकारी संस्था लि. ले दुई दिने साकोस नेतृत्वका तथा कार्यकुशलता विकास तालिम सम्पन्न गरेको छ ।

संस्थाको शेयर सदस्य भएको ३ वर्ष पूरा भएका शेयर सदस्यहरु मध्येबाट सहभागी हुने गरी सञ्चालन गरिएको तालिममा सहकारी र बचत तथा ऋण सहकारी संस्थाको सैद्धान्तिक ज्ञान, सहकारी ऐन, नियमाली र मार्गदर्शनमा सहकारी सञ्चालन तथा कारोबारका सम्बन्धमा भएका व्यवस्थाका बारेमा जानकारी, शेयर सदस्य र सञ्चालकको काम, कर्तव्य र अधिकार, संस्थाले सञ्चालकका लागि तोकिएका योग्यताका बारेमा छलफल, सहकारीमा नेतृत्व र नेतृत्वका आधारभुत गुणहरुका बारेमा जानकारी,  सहकारीमा जोखिम र जोखिम व्यवस्थापनमा सदस्यको भूमिका, प्रभावकारी कार्यकुशलताका लागि समूह कार्यको भूमिका तथा भावी सञ्चालक छनौटमा साझा बुझाईको विकास गराउने उद्देश्य राखिएको थियो । 

नेफ्स्कुनका सञ्चालक जिवससराज खडकाले तालिमको उद्घाटन गर्दै सहकारीलाई सुशासनमा सञ्चालन गर्न र व्यवसायिक सुरक्षाका लागि तालिम प्राप्त र वित्तीय क्षेत्रमा जानकारी भएका सञ्चालकहरु अनिवार्य शर्त भएको बताउँदै सहकारीमा नेतृत्व गर्ने अध्यक्ष, पदाधिकारी तथा सञ्चालक सदस्य र उपसमिति तथा कर्मचारी व्यवस्थापनको समेत समान जिम्मेवारी हुने भएकाले सहकारी ऐन, नियम तथा मार्गदर्शनको पालनामा दबाव दिने तथा स्वार्थगत कार्य गर्न कसैले प्रोत्साहन गर्न नहुने बताउनुभयो । संस्थाका अध्यक्ष राजन श्रेष्ठले संस्थालाई सुरक्षित र गुणस्तरीय ढंगमा सञ्चालन गर्नका लागि विगत १० वर्षदेखि सञ्चालकहरुको क्षमता विकास तालिम, भावी सञ्चालकहरुका लागि पूर्व क्षमता विकास तालिम र सहकारी शिक्षा आयोजना गर्दै आएको बताउँदै कानूनको पालनामा सबैको सहयोग आवश्यक रहेको बताउनुभयो । ३९ जना सहभागी रहेको तालिममा नेफ्स्कुनका बरिष्ठ अधिकृत प्रेम नाथ वाग्ले स्रोत व्यक्तिका रुपमा हुनुहुन्थ्यो ।