सुर्खेत । सुर्खेतका तीन साकोसबीच एकीकरण भएको छ । सुर्खेतको वीरेन्द्रनगर बचत तथा ऋण सहकारी संस्था लि, ओयसिस बचत तथा ऋण सहकारी संस्था लि. र  अभ्यूदय ग्रामीण बचत तथा ऋण सहकारी संस्था लि.बीच एकीकरण भएको हो । चैत्र २२ गते कर्णाली प्रदेश रजिष्ट्रार कार्यालयका रजिष्ट्रार खुम प्रसाद सुवेदीले संस्था एकीकरणको प्रमाणपत्र प्रदान गर्नुभएको थियो । एकीकरण पश्चात वीरेन्द्रनगर बचत तथा ऋण सहकारी संस्थाबाट संयुक्त कारोबार शुरु भएको छ ।  त्रिपक्षीय सहमती भएसँगै तीन साकोसले फागुन २२ गते नै संयुक्त साधारणभा सम्पन्न गरेको थियो । 

सहकारी संस्था एकीकरणको कार्यलाई अभियानकै रुपमा द्रुतगतिमा अगाडि बढाइरहेको साकोसका अध्यक्ष बमबहादुर बिसीले जानकारी गराउनुभयो । उहाँले वीरेन्द्रनगर साकोस वित्तीय रुपमा स्वस्थ र सबल भएकोले सदस्यहरुले ढुक्क भएर संस्थामा कारोबार गर्न सक्ने बताउनुभयो ।  विगत ४ बर्षदेखि सहकारी क्षेत्रलाई मर्यादित र प्रभावकारी बनाउनका निमित्त एक आपसमा अनुभव आदान प्रदान गराउन सहकारीहरुबीच सहकार्य अभियान चलाईएको छ, उहाँले भन्नुभयो । सहकारीबीचको सहकार्यात्मक सम्बन्ध विस्तारले एकीरकण अभियानमा सहजता भएको अध्यक्ष बिसीले बताउनुभयो । 

२०५८ असार २२ गते स्थापना भएको वीरेन्द्रनगर साकोस सुर्खेत जिल्लाभर कार्यक्षेत्र भएको कर्णाली प्रदेशको मुख्य बचत तथा ऋण सहकारी संस्था हो । यस संस्थाले हालसम्म आफूसहित ८ वटा सहकारी संस्था एकीकरण गरेको छ । पछिल्लो पटक ओयसिस बचत तथा ऋण सहकारी संस्था र अभ्यूदय ग्रामीण बचत तथा ऋण सहकारी संस्थासँग एकीकरण गरेको हो । 

एकीकरण पश्चात साकोसको कुल सदस्य संख्या २२ हजार ५ सय ७३ पुगेको छ भने शेयर पूँजी रु १४ करोड ८० लाख ७१ हजार ९ सय पुगेको छ । बचत रकम रु. ६८ करोड ५१ लाख ५२ हजार ८ सय २८ रुपैयाँ पुगेको छ । त्यसै गरी कोष रु ८ करोड ६७ लाख १३ हजार ५ सय ६९ रुपैयाँ रहेको यस संस्थाको रु ९८ करोड ९७ लाख ७ हजार ५ सय ५८ रुपैयाँ ऋण लगानी गरेको छ । साकोसमा रु. १२ करोड ३४ लाख ९५ हजार ७ सय ७१ रुपैयाँ तरलता रहेको छ । विभिन्न संस्थाहरुमा रु ६१ लाख ९२ हजार ४ सय रुपैयाँ लगानी गरेको छ ।  हाल संस्थाको पूँजी रु. १ अरब १५ करोड २४ लाख ९१ हजार ६०८ रहेको जानकारी संस्थाका प्रमुख कार्यकारी अधिकृत छत्रबहादुर थापाले दिनु भएको छ । 

हालसम्म विभिन्न प्रकृतिका ७ वटा सहकारी संस्थाहरुसँग तीन चरणमा गरी सहकारी एकीकरणको काम सम्पन्न गरेको छ । संस्था एकीकरण पछि १७ जनाको सञ्चालक समिति र ३ जनाको लेखा सुपरिवेक्षण समिति रहेको यस संस्थामा सबै सेवाकेन्द्रहरु सञ्चालनका लागि सेवाकेन्द्र व्यवस्थापन तथा सञ्चालन उपसमिति गठन गरेर सेवाकेन्द्रहरु स्थानीय व्यवस्थापनमा सञ्चालन गरिरहेको छ । 

सुर्खेत जिल्लाका विभिन्न १३ वटा स्थानमा रहेका सेवाकेन्द्र मार्फत सदस्यहरुलाई सेवा प्रवाह गरिरहेको छ । संस्था कर्णाली प्रदेशबाट राष्ट्रिय सहकारी महासंघ नेपालको एशोसियट सदस्यता प्राप्त गरेको एकमात्र संस्था हो । विभिन्न राष्ट्रिय स्तरका पुरस्कार प्राप्त गरिसकेको यो संस्था आर्थिक कारोवार, सदस्य संख्या, सुशासन र सेवाक्षेत्रका हिसावले कर्णाली प्रदेशको सबैभन्दा ठूलो बचत तथा ऋण सहकारी संस्था हो ।