सुर्खेत । भेरीगंगा नगरपालिकाको सहयोग र नेफ्स्कून सदस्य सेवा कार्यालय सुर्खेतको आयोजनामा भेरीगंगा नगरपालिका अन्तर्गतका सहकारी संस्थाहरुका लागि व्यवस्थापन तथा प्रवर्धन कार्यक्रम अन्तर्गत सहकारी सिद्धान्त परिक्षण सम्बन्धी २ दिने तालिम असार १४ गते सम्पन्न भएको छ । 

कार्यक्रम भेरीगंगा नगरपालिकाका उद्योग तथा सहकारी शाखा प्रमुख चित्रा कुमारी डाँगीको अध्यक्षता र प्रशासन शाखा अधिकृत कृष्ण प्रसाद शर्माको विशेष आतिथ्यतामा सम्पन्न भएको थियो । तालिम समापन कार्यक्रममा सहकारी शाखाका कर्मचारी सुनिता जैशीको पनि उपस्थिति थियो । 

कार्यक्रममा प्रमुख अतिथि शर्माले सहकारी सञ्चालनका लागि सहकारी सिद्धान्तबारे जानकार हुनु अति नै आवश्यक रकेको बताउनु भयो । सहकारीमा सहकारीका सिद्धान्तहरुको सैद्धान्तिक रुपमा कत्तिको लागु भएको छ त्यो विषयमा पनि तालिमले जानकार गराउने बताउनु भयो । 

कार्यक्रमका सभाध्यक्ष चित्रा डाँगीले सहकारीका सिद्धान्त परिक्षण सम्बन्धी तालिमले सहकारी कसरी सञ्चालन भएको छ । सहकारीका सिद्धान्तका आधारमा सञ्चालन भएको छ छैन भनी संस्थामा परिक्षण गर्न सजिलो हुने बताउनु भयो । सहकारी सम्बन्धी विगत लामो समय देखि तालिम शिक्षाका कार्यक्रम एकदमै कम मात्रामा भएको र यस बर्षमा सहकारीका लागि विभिन्न किसिमका तालिमहरु सञ्चालन गरिएको जानकारी गराउनु भयो । सहकारी संस्थाहरुले पनि संस्थाको वित्तीय मासिक प्रतिवेदन समयमा नै बुझाउनु पर्ने बताउनु भयो । मासिक प्रतिवेदन समयमा नबुझाउँदा सहकारीको अवस्थाको बारेमा जानकारी नहुने विचार राख्नुभयो । 

२ दिने तालिममा सहभागिहरुलाई नेफ्स्कून कार्यक्रम अधिकृत गणेश प्रसाद रेग्मीले सहजीकरण गर्नु भएको थियो । तालिममा भेरीगंगा नगरपालिका अन्तर्गतका विभिन्न सहकारीका सञ्चालकहरुको सहभागिता रहेको थियो । तालिममा प्रशिक्षक रेग्मीले सहकारी सिद्धान्त परिक्षण सम्बन्धी र सम्पत्ति शुद्धिकरण सम्बन्धी विषयमा सहजीकरण गर्नु भएको थियो । 

तालिम समापनका अवसरमा सहभागीको तर्फबाट मन्तव्य राख्दै खिम बहादुर वलीले तालिम एकदमै प्रभावकारी रहेको र यस्ता तालिमले सहकारी सञ्चालनमा सहयोग पुर्याउने विश्वास व्यक्त गर्नुभयो । 

कार्यक्रमको सञ्चालन नेफ्स्कून सदस्य सेवा कार्यालय सुर्खेतका ईन्चार्ज चन्द्रदेव जोशीले गर्नु भएको थियो भने आवश्यक व्यवस्थापन सदस्य सेवा कार्यालयका सहायक मदन कुमार चन्दले गर्नु भएको थियो ।