रामेछाप । रामेछाप जिल्लामा सञ्चालित तीनवटा बचत तथा ऋण सहकारी संस्था जोखिममा आधारित साकोस सुपरिवेक्षण कार्यक्रम कर्ब्समा आबद्ध भएका छन् । कर्ब्स कार्यक्रम नेफ्स्कूनले सञ्चालन गरेको जोखिममा आधारित साकोस सुपरिवेक्षण कार्यक्रम हो ।

रामेछापको गोकुलगंगा गाउपालिका रस्नालुमा सञ्चालित किस्मत साकोस, मन्थली नगरपालिका चिसापानीमा सञ्चालित समावेशी साकोस र लिखु तामाकोशी गाउँपालिका धोविमा सञ्चालित नवसन्देश साकोस कर्ब्स कार्यक्रममा सहभागी भएका हुन् । 

कर्ब्स कार्यक्रममा आवद्ध भएका ३ वटै साकोसको मुख्य कार्यालयमा साकोसका सञ्चालक समिति, कर्मचारी सहितको उपस्थितिमा क्रमशः श्रावण ६, ७ र ८ गते  किस्मत साकोस, समावेशी साकोस र नवसन्देश साकोसमा छुट्टा छुट्टै संक्षिप्त अभिमुखीकरण कार्यक्रम सहित सम्झौता पत्रमा हस्ताक्षर भएको हो । कार्यक्रममा नेफ्स्कूनको तर्फवाट कार्यक्रम अधिकृत सुमनराज घिमिरे र नेफ्स्कून मन्थली सदस्य सेवा कार्यालयका प्रमुख सूर्य बहादुर थापाको उपस्थिति रहेको थियो ।

साकोसका प्रतिनिधिहरुले वित्तीय सहकारीले पैसाकैमात्र कारोवार गर्ने हुनाले जोखिम अत्याधिक हुने र साकोस सञ्चालनमा आईपर्ने जोखिमलाई न्युनिकरण गर्नको निमिक्त नेफ्स्कूनले सञ्चालन गरेको जोखिममा आधारित साकोस सुपरिवेक्षण (कर्ब्स) कार्यक्रमले महत्वपूर्ण भुमिका खेल्नेमा विश्वस्त रहेको बताउनुभयो । सहकारी स्वनियमनमा चल्ने र सदस्यहरुको सम्पत्तीमा सदस्यहरुबाटै नियन्त्रण हुने भएकोले सुशासित, भरपर्दो, विश्वसनिय साकोस निर्माण गर्दै यसको निरन्तरताको लागि आन्तरिक नियन्त्रण प्रणलीलाई सुरुवातबाटै व्यवस्थित बनाउन सक्नुपर्नेमा सहभागी वक्ताहरुले जोड दिनुभयो ।