काठमाडौं । सहकारी क्षेत्र सुधार सुझाव कार्यदल, २०८० ले आज विज्ञहरुसँग छलफल गरेको छ । राष्ट्रिय योजना आयोगको सभाहलमा सोमबार दिउसो आयोजित छलफल कार्यक्रममा कार्यदलका संयोजक सहित सदस्यहरु, विज्ञ सदस्यहरु, राष्ट्रिय सहकारी महासंघ, नेपाल बचत तथा ऋण केन्द्रीय सहकारी संघ लि.(नेफ्स्कून) र राष्ट्रिय सहकारी बैंकका सल्लाहकारहरु सहित सरोकारवालाहरुको सहभागिता रहेको थियो । 

राष्ट्रिय सहकारी महासंघ, नेफ्स्कून र राष्ट्रिय सहकारी बैंकले संयुक्त आयोजनामा गत शुक्रबारदेखि नियमित तेस्रो चरणमा सुझाव संकलनको काम गरिरहेको छ । श्रावण ११ गते बागमती प्रदेशका सरोकारवाला सहकारीकर्मीहरुसँगको भौतिक उपस्थितिकाबीच सुझाव संकलन गरेको कार्यदलले आइतबार जुम मार्फत भर्चुअल रुपमा देशव्यापी सुझाव संकलन गरेको छ भने सोमबार विज्ञहरुसँग छलफल गरेको  हो । सहकारी अभियानको दिगो र संस्थागत विकासका लागि अब दिर्घकालिन समाधानको खोजी हुनुपर्ने भन्दै कार्यदलले हतार नगरिकन अझै समयावधि थप गरि अध्ययन अनुसन्धान र सुझाव संकलन गरि ठोस निष्कर्श सहितको पूर्ण प्रतिवेदन सरकारसमक्ष पेश गर्नुपर्ने सहभागी बक्ताहरुले बताउनुभएको थियो ।