बाँके । सहकारी क्षेत्रमा देखिएका समस्याहरुको समाधानका लागि सरकारले गठन गरेको ‘सहकारी क्षेत्र सुधार सुझाव कार्यदल’ लाई सुझाव प्रदान गर्न शनिवार नेपालगञ्जमा सरोकारवालाहरुसँग सुझाव संकलन कार्यशाला सम्पन्न भएको छ । कार्यशालामा लुम्बिनी, कर्णाली र सुदूरपश्चिम प्रदेशका सहकारीकर्मीहरुको सहभागिता रहेको थियो । सहकारी अभियानको दिगो र संस्थागत विकास साथै विद्यमान समस्याहरुको दिर्घकालिन समाधानका लागि नेपाल सरकारद्वारा गठित सहकारी क्षेत्र सुधार सुझाव कार्यदललाई सुझाव पठाउन देशव्यापी कार्यशाला सञ्चालन गरी सुझाव संकलनको काम भइरहेको हो । 

कार्यशालामा राष्ट्रिय सहकारी महासंघ, नेफस्कून र राष्ट्रिय सहकारी बैकका प्रतिनिधि साथै संघीय विभागका रजिष्ट्रार र कार्यदलका विज्ञ सदस्य एवं नेफ्स्कूनका सल्लाहकार ऋषिराज घिमिरे लगायत तीन वटै प्रदेशका सहकारी रजिष्ट्रार, विभिन्न पालिकाका सहकारी शाखा प्रमुखहरु, राष्ट्रिय तथा स्थानीय पत्रकारहरु सहित १७५ जनाको सहभागिता रहेको थियो । 

राष्ट्रिय सहकारी महासंघ, नेपाल बचत तथा ऋण केन्द्रीय सहकारी संघ लि.(नेफ्स्कून) र राष्ट्रिय सहकारी बैंकको संयुक्त आयोजनामा सञ्चालित कार्यशालाले सहकारी क्षेत्र सुधारका लागि नियमित सुझाव संकलनको काम गरिरहेको छ । श्रावण ११ गते बागमती प्रदेशका सरोकारवाला सहकारीकर्मीहरुसँगको भौतिक उपस्थितिकाबीच सुझाव संकलन गरेको कार्यदलले श्रावण १४ गते जुम मार्फत भर्चुअल रुपमा देशव्यापी सुझाव संकलन गरेको थियो भने १५ गते सोमबार विज्ञहरुसँग छलफल गरी सुझाव संकलनको काम गरेको थियो ।