सुर्खेत । नेपाल बचत तथा ऋण केन्द्रीय सहकारी संघ लि. (नेफ्स्कून) को सदस्य सेवा कार्यालयको आयोजनामा कर्णाली प्रदेशको सुर्खेतमा साकोस अभियानको नेतृत्व पुनर्जागरण सम्बन्धी कार्यक्रम भाद्र १२ गते नेफ्स्कूनका अध्यक्ष परितोष पौड्यालको अध्यक्षतामा सम्पन्न भएको छ । 

नेफ्स्कूनले आबद्ध सदस्य संघ संस्थाहरुको आशन्न निर्वाचनसहितको साधारणसभालाई लक्षित गरि सहकारीमा देखिएका समस्याहरुको व्यवस्थापन र साकोस अभियानमा नेतृत्व पुनर्जागरण सम्बन्धी कार्यक्रम सञ्चालन गरेको हो । 

नेफ्स्कूनको ३६औं स्थापना दिवस समारोहका अवसरमा श्रावण ३२ गते संघका अध्यक्ष परितोष पौड्यालले देशव्यापी रुपमा साकोस अभियानमा नेतृत्व पुनर्जागरणको अभियान सञ्चालन गर्ने उद्घोष गर्नुभएको थियो । सोही अनुरुप ७ वटै प्रदेशमा नेतृत्व पुनर्जागरणका कार्यक्रम सञ्चालनको शुरुवात भएको छ । भाद्र ११ गते सुदूरपश्चिम प्रदेश–कैलालीको धनगढीमा कार्यक्रम सम्पन्न भएको थियो । 

सुर्खेतमा आयोजित कार्यक्रमलाई सम्बोधन गर्दै संघका अध्यक्ष पौड्यालले साकोस अभियानमा कोअपरेटिभ लिडरसीप अन्तर्गत लिडरसिफ्टको आवश्यकता औल्याउनुभयो । उहाँले नयाँ आयाममा नयाँ गतिमा अगाडि बढ्न सहकारीको दार्शनिक मूल्यमा टेकेर परिवर्तन खोजिरहेको र यसका लागि इकोनमिक लिडरसीप साथै इगल लिडरसीप अवको आवश्यकता भएको बताउनुभयो ।  उहाँले मुलुकभर पुर्नजागरण अभियान सञ्चालन गर्न लागेको जानकारी दिंदै साकोस अभियान सफल बनाउन स्रोतको बाँडफाँड, सञ्चालनमा स्तरीकरण, करारीय ऐक्यबद्धता, सुशासन प्रवर्धनको रणनीति र आन्तरिक  नियमनको स्थापना गरेर अघि बढ्नुपर्ने औंल्याउनुभयो ।

कार्यक्रममा अतिथिको रुपमा सहकारी रजिष्ट्रार कार्यालयका रजिष्ट्रार खुम प्रसाद सुवेदी, नेफ्स्कूनमा महासचिव दामोदर अधिकारी, नेफ्स्कूनका सञ्चालक यज्ञ प्रसाद ढकाल, माधव प्रसाद जोशी, नेफ्स्कूनका प्रमुख कार्यकारी अधिकृत डा. शिवजी सापकोटा, जिल्ला सहकारी संघ लि. सुर्खेतका अध्यक्ष अमृत बि.सी., जिल्ला बचत तथा ऋण सहकारी संघ लि.का अध्यक्ष पदम दाहाल, नेफ्स्कून उद्यमशिल केन्द्रीय उपसमिति सदस्य वीर बहादुर रावत, सुर्खेत सदस्य सेवा कार्यालय व्यवस्थापन उपसमिति सदस्य बम बहादुर वि.सी, भुपेन्द्र बहादुर सिंह, बल बहादुर नेपालीको उपस्थिति रहेको थियो ।