बारा । गत साता दिवंगत नेफ्स्कूनका पूर्व सञ्चालक डा. कृष्णप्रसाद पौडेलप्रति सहकारी अभियानका तर्फबाट श्रद्धाञ्जली व्यक्त गरिएको छ । सहकारी अभियन्ताहरुले आज स्वर्गीय पौडेलको बारा डुमरवानास्थित निवास पुगी हार्दिक समवेदनासहित श्रद्धाञ्जली व्यक्त गर्नुभएको हो । 

पौडेलको गत असोज २५ गते निधन भएको थियो । उहाँको निधनको सातौं दिन आज सहकारी अभियन्ताहरुले परिवार र आफन्तजनलाई भेटी सान्त्वनासहित समवेदना प्रकट गर्नुभएको हो । पूर्व मन्त्री एवम् राष्ट्रिय सहकारी महासंघ नेपालका निवर्तमान अध्यक्ष केशव बडाल, नेपाल बचत तथा ऋण केन्द्रीय सहकारी संघ लि. नेफ्स्कूनका अध्यक्ष परितोष पौड्याल लगायत सहकारी अभियन्ताहरु आज स्वर्गीय पौडेलको निवास पुग्नुभएको हो । 

सहकारी अभियन्ताहरुले स्वर्गीय पौडेलको असामियक निधनबाट आफुहरु मर्माहित भएको भन्दै उहाँको जीवनको क्रियाशीलताबाट प्रभावित भएर सदैव सकारात्मक उर्जा साथ अघि बढ्ने प्रतिबद्धता व्यक्त गर्नुभएको छ ।

बाराको जितपुर सिमरा उपमहानगरपालिकाका पूर्व मेयर समेत रहनुभएका स्वर्गीय पौडेलले सहकारी, राजनीति, पत्रकारिता, लेखापरिक्षणसँगै सामाजिक अभियन्ताको छविसमेत बनाउनुभएको थियो । २०२९ साल फागुन १० गते जन्मनुभएका स्वर्गीय पौडेलले नेफ्स्कूनको २ कार्यकाल सञ्चालक सदस्य भई योगदान पुर्याउनुभएको थियो ।