दोलखा जिरीस्थित एकीकृत फ्रेण्डसिप साकोसको आयोजना तथा नेफ्स्कूनको प्राविधिक सहयोगमा आजबाट काभ्रेको पनौतीमा तीन दिने ‘लीडरशीप बुटक्याम्प’ सुरु भएको छ । तालिममा साकोसको सञ्चालक समिति, सल्लाहकार, उपसमिति, उच्च व्यवस्थापन गरी ३० जनाको सहभागिता रहेको छ ।

तालिम उद्घाटनमा प्रमुख अतिथि नेफ्स्कून अध्यक्ष परितोष पौड्यालले नेतृत्व रुपान्तरणको ११ विधि समेटिएको ‘बुट क्याम्प’ सहकारी अभियानका लागि अत्यन्त उपयोगी हुने बताउनुभयो । उहाँले सहकारी अभियानको नेतृत्व रंगविहिन, गन्धविहिन, स्वादविहिन र जुनसुकै परिस्थितिमा घुलिन हुनसक्ने हुनुपर्ने भन्दै यी विषय ‘लीडरशीफ्ट बुटक्याम्प’ ले सिकाउने बताउनुभयो । देश निर्माण र एकताको शक्ति सहकारी मात्र रहेको भन्दै उहाँले यसका मूल्य, मान्यता र सिद्धान्तलाई नेतृत्वले आत्मसात गर्नुपर्ने र सहकारीमार्फत समाजको रुपान्तरण, वृद्धि र विकासको प्रण गर्नुपर्ने आवश्यकता औंल्याउनुभयो । 

संस्थाका अध्यक्ष भूमिराज खड्काले सिकाइ कहिल्यै नसकिने प्रक्रिया भएको बताउनुभयो । तालिम कार्यक्रममा पनि सदस्यको पैसा लगानी भएको भन्दै सिकाइलाई उपलव्धमिूलक बनाई सदस्य हित र जीवनस्तर सुधारमा प्रयोग गरिनुपर्नेमा जोड दिनुभयो ।

उद्घाटनमा नेफ्स्कूनका सञ्चालक जिवसराज खड्का तथा काभ्रेको सामुदायिक साकोसका अध्यक्ष एवम् स्थिरीकरण कोष सञ्चालन समितिका सदस्य प्रकाश बञ्जारा पनि सहभागी हुनुभएको थियो । स्वागत मन्तव्य संस्थाका उपाध्यक्ष केदार बहादुर जिरेलले राख्नुभएको थियो । तालिम सहजीकरण नेफ्स्कूनका निमित्त प्रमुख कार्यकारी अधिकृत एवम् प्राचार्य सञ्जयराज तिमिल्सीना तथा तालिम अधिकृत उमेश कोइरालाले गर्नुभएको छ ।