नेपालगञ्ज । नेफ्स्कूनका वरिष्ठ उपाध्यक्ष दामोदर अधिकारीले सहकारी अभियानकर्मीहरुको सुझाव र सल्लाह आफुले सधैं शिरोपर गर्ने बताउनुभएको छ । सहकारी तथा साकोस अभियानको छवि सुधारसँगै विकास, प्रवर्धन र सुशासनका दिशामा अभियानकर्मीहरुबाट प्राप्त रचनात्मक सल्लाह र सुझावहरु मननीय हुने भन्दै उहाँले तिनलाई आफूले उच्च महत्व दिने जानकारी गराउनुभयो । 

नेफ्स्कूनको ३२औं वार्षिक साधारण सभाबाट बरिष्ठ उपाध्यक्षमा निर्वाचित भएपछि पहिलो पटक गृह प्रदेश पुग्नुभएका अधिकारीले आज बाँकेमा अभियानकर्मीहरुबाट प्राप्त सुझावहरुको निष्कर्ष नेफ्स्कूनको सञ्चालक समितिको बैठकमा राख्ने विश्वास दिलाउनुभयो । उहाँले अभियानभित्र सुशासन, इमानदारी, पारदर्शिता र नीतिको प्रधानतामार्फत छवि सुधारलाई नेफ्स्कूनको नवनिर्वाचित सञ्चालक समिति तथा लेखा सुपरिवेक्षण समितिले प्राथमिकतामा राखेको उल्लेख गर्नुभयो । यस क्षेत्रका सहकारीका समस्याहरुसँग आफू नजिकबाट परिचित भएको भन्दै उहाँले तिनको समाधानका लागि आफ्नोतर्फबाट खेल्नुपर्ने भूमिकालाई थप सशक्त बनाउने प्रतिबद्धता व्यक्त गर्नुभयो । सृजनात्मक सुझावहरुका लागि उहाँले अभियानकर्मीहरुप्रति कृतज्ञतासमेत जाहेर गर्नुभयो । 

आज बाँकेका सहकारी अभियानकर्मीहरुसँगको अन्तरक्रियामा नेफ्स्कूनका बरिष्ठ उपाध्यक्ष अधिकारीले सदस्यहरुको हितलाई ध्यानमा राखेर नेफ्स्कून अघि बढ्नेमा आश्वस्त तुल्याउनुभयो । अन्तरक्रियामा उहाँलाई अभियानकर्मीहरुले सदस्यहरुको समस्यालाई केन्द्रमा राखेर संघले काम गर्नुपर्ने, सुशासनलाई प्राथमिकता दिनुपर्ने, बहसपैरवीलाई सघन बनाउनुपर्ने लगायतका सुझावहरु प्रदान गर्नुभएको थियो । अभियानकर्मीहरुका तर्फबाट नवनिर्वाचित बरिष्ठ उपाध्यक्ष अधिकारीलाई बधाईसहित कार्यकाल सफलताको शुभकामना समेत व्यक्त गरिएको नेफ्स्कून नेपालगञ्ज सदस्य सेवा कार्यालयका प्रमुख छत्रप्रसाद जैसीले साकोस आवाजलाई जानकारी गराउनुभयो ।

आजको अन्तरक्रिया कार्यक्रममा प्रदेश सहकारी संघका अध्यक्ष प्रेम सुवेदी, प्रदेश बचत संघका वरिष्ठ उपाध्यक्ष, उपाध्यक्ष, जिल्ला सहकारी संघका पदाधिकारी, जिल्ला बचत संघका पदाधिकारी लगायत अगुवा सहकारीकर्मीहरुको उपस्थिति थियो ।